Shillong, Nailar 21: Artylli ki ïing ki la shah pynjulor ha u hati khlaw ha ka shnong Dakupara, South West Garo Hills, ha ka step jong ka 21 tarik Nailar.
Katkum ka jingiathuh ki heh Sorkar, katei ka jingjia ka la jia ha ka por 3 baje mynstep ha kaba uwei u hati u la pynjulor ia kawei ka kamra shet jingshet kaba dei ka iing jong u Remol Hajong.
Watla ki briew ba don ha iing kim shym la mynsaw hynrei ka kamra shet kala shah pynjulor bun bha.
Ha kawei pat ka jingjia ha ka juh ka shnong, kawei ka ïing sah kaba dei ruh ka kudam jong u Sonutibala Hajong ka la shah pynjulor.
Ki bor jong ka District Disaster Management Authority (DDMA) ki dang bishar bniah ia ka jingduh nong naka jingshah pynjulor bad ki dang bishar naka bynta ban shim ia ki sienjam ban ai jingiarap ia ki longiing kiba shah ktah katkum ki kyndon.
Ki bor district ka la kyntu ia ki nongshong shnong ba kin long kiba husiar bad pyntip mardor ia kino kino ki jingleit jingwan jong ki hati khlaw.
