Shillong, Naiwieng 15 : Ka Sorkar Jylla kala kyrpad ia ka Joint Parliamentary Committee (JPC) ban pyrkhat biang bad pyn kylla ia ki katto katne ki kyndon ba kyrpang jong ka FCRA Amendment ki ban ktah beit beit ia ki kynhun Khristan bad ki paid Khristan, ong u Symbud Myntri Rangbah ba khmih ia ka Parliamentary Affairs bad State President ka NPP Bah Prestone Tynsong.
“Ngi la buh ia ki jingai jingmut jong ngi hakhmat ka committee bad la ai jingthoh sah ka JPC, ba kyrpad ba kan pyrkhat biang ia kine ki kyndon” ong u Bah Prestone.
“Ka nongrim jong ka Sorkar Jylla ka long ban pynkylla ia ki katto katne ki lain ha ka amendment bala tyrwa. Kim dei ban long pyrrkhing shaba palat” ula bynrap.
U Bah Prestone ula pynshai ba ka Jylla kam shym la pyrshah ban pynkylla ia ka Act.
“Ka Act kala don la slem bha. Ia ki amendment la leh wat ha ka por jong ka Sorkar Congress ha u 2010 bad 2012” ula ong bad bynrap ‘Ki amendment, namar kata, ki paw ha ngi ba ki long kiba kongsan bad ba donkam ban leh”.
Hynrei ula ong, ba ki don katto katne ki kyndon kiba dang don ka jingsngewkhia.
“Katto katne ki lain ha ka amendment bala tyrwa, ngi sngew shimet, kin ktah beit beit ia ki kynhun Khristan bad ki paid Khristan” ula ong.
Haba jubab ia ka jingkyrpad ba dang shen jong u MP barim ka Rajya Sabha bad State President barim ka NPP Dr WR Kharlukhi ia ka BJP bad NPP ban vote pyrshah ia ka FCRA Bill ynda wanrah ha Parliament, u Bah Prestone ula kyntait ban kynthoh eiei tad haduh ba ka JPC kala pyndep iala ka kam.
“Ia mynta, Ngam don eiei ban ong, naba ka Joint Parliamentary Committee ka dang shong bishar ia ka kam” ula ong bad bynrap “Ka JPC kala wan sha Shillong dang shen bad iakynduh ia ki kynhun bapher bapher halor kane ka kam. Ngam kwah ban kynthoh eiei tad haduh ba ka JPC kala aiti ia ki jingai jingmut sha ka Sorkar India”.
