Shillong, Naiwieng 15 : U Myntri kam Jngohkai Bah Paul Lyngdoh ula kren shai ba u kloi ban iashong ha ka miej iakren bad ka Joint Action Committee (JAC)- hynrei tang lada ka kynhun ka kloi ban sngap, ym ban ieng pyrshah ne pyni jingbitar.
Haba kylli la u kloi ban iakynduh ia ka JAC, u Myntri ula ong ba um don jingeh satia, hynrei ka kynhun ka dei ban wan da ka mynsiem ban sngap bad pdiang ruh ia ki jingiakren.
“Ngam don jingeh eiei ban khot ia ka JAC sha ka jingiakren, hynrei ki dei ban wan da ka mynsiem ban sngap bad pdiang ruh ia ki jingiakren. Ngi hap ban sngap mar kylliang, kaba kham kongsan eh” ula ong.
“Ka jingiakren ha katei ka kyrdan ka dei ban lait na ki jingsngew shimet bad jingbitar, bad ki briew ki dei ban long kiba kloi ban sngap bad peit ia ka bynta jong ngi” ula bynrap.
U Bah Paul ula ong ba ka Sorkar kam pat khang satia ia ka jingkhang. “Ngi lah ju kren barabor ba ngi lah ban iakynduh ha kano kano ka por bad ki jingkhang jong ngi ki plie beit” ula ong.
Ula pynkynmaw ia ki jingpyrshang ba hashuwa ban iakren pynbeit hynrei kane kala pulom.
“Ka long kaba sngewsih ba haba u nongialam bala rangbah bad u dkhot ka Kynhun Myntri, Bah Sanbor Shullai, ula khot kyrpangia ki dkhot ka JAC ban wan shakhmat ha kaban iakren, kala kylla sha kawei pat ka bynta ka bym poi pyrthei” ula ong.
“Ha kum kane ka jinglong jingman kaba ki briew ki shu hylla haduh u pud ba ym lah ban iohsngew eiei shuh, te kam don jingmut shuh ban pynlong ia ka jingiakren” ula bynrap.
“Kam shym la don ka jingiakren namar ki briew ki jied ban ieng pyrshah ha ka jaka ban iashimbynta ha ka jingiakren” ong u Bah Paul haba pynpaw ba kum u Myntri u dang kloi uba kloi ban sngap ia ka JAC.
“Nga kwah ia ka JAC ba kan wan shakhmat. Lehse kin pyntip sha ngi ia kijuh ki jingsngewkhia. Ka pork am pat dier. Ngi long kiba kloi ban sngap ia ki,bad ki ruh ki dei ban long kiba kloi ban sngap ia ngi” ula ong.
U Bah Paul ula buh dak jingkylli ia ka por ba mih kane ka jingiakhih, haba pynpaw ba ka project ka dei kaba la sdang naduh u snem 2022.
“Ka project kala sdang ha u 2022. Ngam pat dei satia u dkhot ka Iingdorbar Thaw Ain ha katei ka por. Ia ka MoU la iasoi ha ka 16 tarik Kyllalyngkot, 2023. Ha ka por ba nga dang dei tang u kyrtong sha ka elekshon Assembly. Kumta ia ka MoU la iasoi ha ka por jong ka Sorkar MDA-I” ula ong.
“Balei kane ka kynhun kam mih ban pynsngew ia kajuh ka mat kaba ki pynmih mynta? Jia haduh ha u 2022 haduh mynta?” ula buh jingkylli.
“Ha ka sien ba nyngkong ha ka por ba u shimti ia ka Tnad Tourism ha u 2023, Nga dang don ha Ophis dang arsnem shiteng, bad ha kine ki arsnem shiteng ruh ym shym don mano mano ruh ki ban iakren bad nga ban pynpaw ia kine ki jingeh, ki jingsngewkhia ki ba ka Sorkar kan pynbeit. Ym shym la don kine kiei kiei baroh” ula ong.
“Naduh u 2022 haduh mynta, kala iaid la jan san snem. Balei kynsan kynsan mih ka jingpyrshah? Balei kane ka jingiakhih ba kynsan kynsan” ula ong.
Halor ka jingpynkynriah ia ka project, u Bah Paul ula ong ba kane kam dei ka kam cut-and- paste.
“Ka project ka dei kaba la pynwandur kat kum ka jinglong ka jaka- ngim don satia ia u budam cut-and-paste kaba phi lah ban rah ia kane sha kawei pat ka jaka. Baroh kiei kiei kin hap sdang biang naduh kaba sdiang-ki jingbit, ka jingtest ia ka khyndew, ka jingwad bniah ia ki jingthung jingtep. Baroh kine ki survey bad jingwad bniah kin hap ban sdang biang naduh kaba sdang” ula ong.
Ula ong ba ka project kala dep ioh ia ka jingbit na ki san tylli ki Ministry ka Sorkar India bad kan iarap ba kyntiew ia ka kam jngohkai shabar ka Shillong bad kan pynbun ia ka jingleit jngohkai ki briew sha ki jaka kum ka Mawlynnong, Sohra, Laitlum bad kiwei kiwei.
