Shillong, Nailar 21 : Ka seng Khasi Students’ Union (KSU) ha ka sngi Thohdieng, kala leit aiti ia ka dorkhas sha baroh 36 ngut ki MLA ka ri-lum Khasi Jaintia kum shibynta ban pynbor ia kine ki nongmihkhmat ba kin kren bad pynsngew ia ki 5 tylli ki mat dawa ka seng hakhmat ka sorkar khamtam ha ka Dorbar Synrai ka Iingdorbar Thaw Ain ka Jylla, ka ban sdang naduh ka 24 tarik Nailar.
Ha kajuh ka por, ka KSU da kawei ka jingmut, kala rai ban pynlong ia ka jingiashong kyllain mungor ha ka 24 tarik Nailar ha u Motdur ba shi rynieng u Woh Kiang Nangbah, mar pyrshah ka Shillong Civil Hospital naduh ka por 11 baje mynstep.
Ha ka sngi kaba bud, ka seng kan pynlong ia ka jingiashong kyllain mungor sa ha ki 7 tylli ki District ka Bri Hynniewtrep.
Ia kane la pyntip da u Assistant General Secretary samla Pynshai Rani haba iathuh ba ka seng kan sa pyrshang ruh ban pynpoi ia kane kajuh ka dorkhas sha baroh 24 ngut ki MLA ka ri-lum Garo.
Ia kane ka jingleit aiti dorkhas la shim bynta da ki dkhot na ki Unit bad ki Circle bapher bapher kiba hap ha ki constituency kaba ki MLA ki mihkhmat.
“Ia ki MLA la jied da ki paidbah bad ka dei ka kamram jongki ban kren ia ki mat ki jura kiba ktah ia ka lad ioh kam ioh jam bad ia ki jingeh jong ka Jaitbynriew ruh baroh kawei” ong u samla Pynshai haba bynrap “Ka seng ka ieh ha ka jingstad jong ki Nongmihkhmat ia ka kamram kaba ki dei ban leh”.
Ha kajuh ka por, ula pyntip ba ka KSU kan ym shong kli kti ban iakhih halor kitei ki mat jingdawa katba ka Sorkar Jylla kam pat lah ban pyntreikam pura ia ki.
“Namar kata, ngi la rai ban pynlong ia ka jingiashong kyllain mungor ha ka 24 tarik ha u Motdur ba shiryngieng u Woh Kiang Nangbah mar pyrshah ka Civil Hospital. Ha ka sngi kaba bud (25 tarik) yn pynlong ia ka jingiashong kyllain mungor ha baroh 7 tylli ki district ka Bri Hynniewtrep” ula ong.
Une u Nongialam ka KSU ula pyntip ruh ba ha kaba iadei bad lashai ka sngi ka 22 tarik Nailar, ka seng kan ym buh ia kino kino ki prokram jingiakhih khnang ba kan ym pynwit ia ki samla ki ban iakhun ia ka eksam LDA ba pyniaid da ka MPSC.
 ha ka sngi Thohdieng, kala leit aiti ia ka dorkhas sha baroh 36 ngut ki MLA ka ri-lum Khasi Jaintia kum shibynta ban pynbor ia kine ki nongmihkhmat ba kin kren bad pynsngew ia ki 5 tylli ki mat dawa ka seng hakhmat ka sorkar khamtam ha ka Dorbar Synrai ka Iingdorbar Thaw Ain ka Jylla, ka ban sdang naduh ka 24 tarik Nailar.){kind=link}