Shillong, Jylliew 29: U Myntri ka tnat Sports and Youths Affairs Bah Wailadmiki Shylla u la ong ba ka Jylla Meghalaya kan sdang ban leit jngoh ia kiwei pat ki jylla ka thain Shatei Lam Mihngi, kiba pynlong lang ia ka National Games hadien ka lehniam Behdienkhlam.
Ka National Games ka lah ban pynlong ha u bnai Lber 2027.
“Ka jingbuddien iaka jingpynkhreh ka dang iaid shakhmat, ha ka ba dangshen u Myntri ka Sorkar Pdeng u la leit jurip iaki katta katne ki jaka ban pynlong iaka National Games, ngi la iakren bniah ia baroh” ong u bah Wailad.
“Naduh ki jingtei haduh ki jaka ialehkai ngi la iakren lut ïa baroh. U Myntri ka Sorkar Pdeng u la pynpaw ruh ba u kmen bad sngewskhem bha halor ka jingpynkhreh jong ka Meghalaya.”
U Bah Wailad ula ong ba ka bynta kaba bud ka kynthup ia ka jingiatreilang hapdeng ki Jylla ka thain Shathei Lammihngi.
“Mynta ka la dei ka por ban leit jngoh ïa kiwei pat ki jylla ka thaiñ Shatei Lam Mihngi ki ban pynlong lang bad ka Meghalaya iaka National Games. Namar ba ka lehniam Behdienkhlam ka la jan, ngi thmu ban leh ïa kita ki jingleit jngoh hadien ba ka la kut” u la ong.
Halor ka por ba la buh ban pynlong iaka National Games, u Myntri u la pynshai ba ka tarik kaba khatduh ka dang sahteng.
“Ym pat lah ban pynthikna, hynrei ka por ba ngi la buh ha ka sien kaba la dep ka long ha u bnai Lber 2027,” u la bynrap.
