Shillong, Naiwieng 2: U Myntri Rangbah ka Jylla u Conrad K Sangma ha ka sngi Nyngkong ula ong, ba u dap da ka jingkmen ba ka Joint Parliamentary Committee on the FCRA Bill kala jied ban sdang ia ka jingialang kaba nyngkong ka jongka ha Shillong hadien ba ula kyrpad ia u Chairman u Sanjay Jaiswal ban wan sha Shillong.
“Ha ka por ba nga don hapoh ka Parliament ha u snem 2016, nga lah don ia ka jingiadei paralok kaba khlain bad u bad bun kiwei kiwei ki MP hynrei ngi ju iahap jingmut bha ruh. Kumta nga sngewkmen bha ba ula shah thung kum u Chairman jong ka JPC bad udei shisha u briew uba biang tam namar ba u long u briew uba shemphang bha, uba lah ih bha ha ka kam bad udei u briew uba sngewthuh ia ka jingsngew jong ka ri hi baroh kawei” la ong u Sangma.
Ula ong, ba ula phone mardor ia u Jaiswal hadien ba ula shimti ia ka kam.
“Haba ula shimti, nga lah phone ia u mardor bad kyrpad ba udei ban wan sha Shillong bad ki kynhun bapher bapher bad ki kynhun niam kiba ioh pdiang ia ki jingiarap na shabar ri, ngi lah ban pynlong ia ka jingialang hapoh ka nongbah Shillong. Ula dap da ka jingkmen bad ula mynjur mardor hi. Dei halor kane, ba kila don hangne mynta ka sngi bad hynnin ka sngi” la ong u Sangma.
U Myntri Rangbah ula iathuh ruh ba ula iakynduh ia kane ka Committee ha Umroi Airport hashwa ba kin leit phai noh.
“Nga lah iakynduh ia ki ha Airport ha Umroi hashwa ba kin leit phai noh bad nga lah ai khublei ia ki halor ka jingwan jngoh. Ngim shim la iohlad ban iakren bniah bha. Hynrei kaei kaba kongsan ka long ba baroh kiba donbynta ha ka kam kiba don ia ki jingsngewkhia kila ioh ia ka lad ban pynsngew ia ka jingsngewkhia ka jongki. Nga lah ioh jingtip ba ka JPC ka long kaba iar jingmut bha bad la ioh ban iakren bniah bha halor ki mat ki bapher bapher bad kala ai por 15 sngi ia ki kynhun ba kin aiti ia ka nongrim bad ia ka jingsngewkhia ka jongki” ula ong.
“Ka long kaei kaei ka rukom leh kaba i koit i khiah bha kaba lah jia bad nga ngeit skhem ba ngin sa iohi ia ki jingmih kiba bha. Haba nga lah kren ia ki dkhot jong ka JPC ha Airport ruh, kila pynpaw ba hooid, ngi lah sngap ia baroh bad ngin sa khmih bniah bha ia ki mat bad ngin sa peit ruh kumno ba ngin iaid shaphrang” ula bynrap.
“Ka JPC mynta kan leit sha Chennai bad ha kiwei kiwei ki jaka jong ka South India. Nga sngewkmen ba ki lah wan bad nga sngewnguh shibun ia u Chairperson bad ia baroh ki dkhot kiba la jied ia ka Shillong kum kawei na ki jaka ba kin wan jngoh” la ong u Sangma.
