Shillong, Naiwieng 02 : U Myntri Rangbah ka Jylla Conrad K Sangma ha ka sngi Nyngkong ula ong ba ki jingiakhih pyrshah ia ka Shillong Ropeway Project ka long kaba sngewsih nabar ia baroh ki mat jingsngewkhia bala pynsngew ki dei kiba la dep pynshai, bad maham ba ka jingpyrshah ia ka project kan ktah ia ka lad iohkam iohjam ki samla.
“Ka long shisha kaba sngewsih. KI don ki jingsngewkhia bala pynsngew da ki katto katne ki seng bad ki riew shimet bad ka Tnadkala pynshai ha jan baroh ki bynta. Ka jingsngewkhia jong nga ia mynta ka long ban top ia kiei kita ki jingsngewkhia bad lada don ki jingeh kiba sngewdei shisha, ngi dei ban iakren bad pynbeit ia ki, hynrei ban pyrshah tang n aka daw ban shu pyrshah ka dei ka rukom kaba bha ha ka synshar khadar bad ha ka sain pyrthei” ong u Conrad.
Ula ong ba ia ki jingsngewkhia kiba dei hok shisha dei ban kyrshan lang bad ki nongrim.
“Phi hap ban kyrshan ia ki jingsngewkhia jong phi da ki nongrim kiba dei hok bad kumta lada don kano kano ka jingeh, bad lada dei kiba dei hok, ngin sa iakren ia ki, ngim don jingeh ban leh ia kata” ula ong.
U Conrad u ong ba kane ka project ka dei kaba la dep bishar bniah da ki agency ba shemphang halor kane ka kam mynta la arsnem.
“Ngi la pynlut jan arsnem shiteng halor kane ka project bad baroh ki agency ba don bynta ha ka jingbishar ia ki kam technical ki dei ki agency kiba la shemphang bha, bad kumta baroh ki bynta bapher bapher ba iadei bad ka mariang bad kiwei kiwei, jan baroh na ki, em baroh na ki Nga dei ban ong, ki dei kiba la dep pynbeit. Kumta kam don daw satia balei ba kan nang mih kano kano ka jingeh” ula ong.
“Haba mih ka jingpynsngew ia ki jingsngewkhia, ka Commissioner & Secretary ka Tnad Tourism bad Industries kala ai jingpynshai, kumjuh ruh na ka MTDC bad u MD jong ngi ruh ula pynshai ia baroh ki mat bad ki ruh kila pdiang ba hooid ngi la iohi ia ki jingpynshai bad ki jingpynshai ki long kiba shai bha. Kumta, Ngam iohi balei ba dei ban pynsangeh mynta bad namar ia ki jingsngewkhia lah dep ban pynbeit, ngi dei ban pyniaid shakhmat ia ka kam” ula bynrap.
Haba ban jur halor ka jingthaw ia ka lad iohkam iohjam, u Myntri Rangbah ula ong “Baroh ngi iakren halor ka jingthaw ia ki lad iohkam iohjam bad ujor ba duna eh ka iohkam iohjam ki samla jong ngi. Balei ba ngi pyntrei ia kane ka project?. Kane ka project kan kyntiew ia ka kam jngohkai sha kawei pat ka kyrdan bad ki kabu ki ban mih na ka kin dei kiba bun bha, kin don da ki spah, wat da ki hajar na ki samla ki ban iohkam beit beit na ka project bad da ki hajar kin ioh lyngba kiwei pat ki kam”.
“Kumta lada phi pyrshah ia kane, phi la ktah ia ka kamai jakpoh bad ka lad iohkam iohjam jong ki samla jong ngi. Ngi hap ban kynmaw ia kane. Lada don ka jingsngewkhia halor ka mariang, ngi long kiba kloi ban iakren bad pynbeit ia kine ki jingsngewkhia hynrei kat kum ka jingtip jong nga bad ki jingbatai bala ai, kam don satia kum kane ka jingeh” ula ong.
“Hynrei ngi la duh ia ka lad aikam aijam, kaba dei kawei na ki bynta kaba kongsan bha bad ki daw balei ba ngi kyntur ia kane ka project. Kumta kane kan ktah ia ki samla jong ngi bad ngi dei ban sngewthuh ba ki samla ki long kiba kongsan ia ngi. Kito kiba pyrshah ia ka project kila pyrshah ia ka lad kamai jakoh kaba ki samla jong ngi kin ioh na kane ka project. Ngi hap ban pyrkhat ia kine kiei kiei baroh haba ngi jam shakhmat” ong u Conrad.
Halor ka por ba mih kane ka jingpyrshah, ula ong “Kane kam dei ka kam kaba ngi dang sdang hynnin ka sngi. Ki kam jong ka project kila iaid la arsnem shiteng, lada don ki jingsngewkhia kiba khraw, kila dei ban pynsngew naduh mynno hynrei kat kaba dei ka daw, kila rai ban nym leh ia kata. Hynrei syndet syndet ynda la dei ban aiti ia ka project ban pyntrei, kila mih ban pyrshah. Hynrei kaei kaba kongsan ia ngi ka long ban pynbeit ia ki jingeh, jam shakhmat, peit ba ka project kan dep bad pynthikna ba kan aikam aijam ia ki samla jong ngi”.
Halor ka jingleit khang ki Ophisar ka KHADC, u Conrad ula ong “Ngi la bud ia ki rules bad ki ain bad kano kano ka sienjam kaba dei ban shim ngin sa shim. Kat kiba dei ki ophisar na ka KHADC, kiba la leit bad leh ia kane, haba pynshong nongrim ia ki kyndon ka ain, ka Jylla kan leh ia kaba donkam bad ka ain kan shim la ka jong ka lynti”.
