Shillong, Naiwieng 2: U Myntri Rangbah ka Jylla u Conrad K Sangma hynne ka Sngi Nyngkong, ula ong ba un sa rai ban pynkhamti ia ki tnad ha u Bah Paul Lyngdoh u myntri uba la rung thymmai ha ka kynhun myntri bad ia kane yn sa leh ha kine ki shi sngi ne ar sngi.
U Bah Paul Lyngdoh u MLA ka West Shillong ula shah pynbam smai ha ka sien ka baar kum u Myntri Sorkar ha kane ka sorkar MDA-II hadien ba ula leit ban pyniasoh noh ialade sha ka National People’s Party ryngkat bad ki 2 ngut ki MLA barim ka UDP.
La pynbam smai ia u Bah Paul Lyngdoh da u Lat ka Jylla u CH Vijayashankar ha ka jingdonlang u Myntri Rangbah ka Jylla, ki Symbud Myntri Rangbah ka Jylla kiba kynthup ia u Prestone Tynsong bad u Bah Sniawbhalang Dhar, ki Myntri Sorkar, MLA ki heh sorkar bad kiwei kiwei.
Haba kylli la yn pynkhamti biang ha u Bah Paul Lyngdoh ban khmih ia ka kam jngohkai, u Conrad Sangma ula ong, “Ngan sa shim ia ka rai ha ka shi sngi ne ar sngi kiban wan, kumta ailad ia nga ban leh ia katei bad shisien ba nga lah dep leh ia katei bad kaei ka jingbhah kam kaba yn sa aiti yn sa pynbna. Ngam pat shim satia ia kano kano ka rai kaba khatduh. Shisien ba nga lah leh ia ka tei, nga tharai lashai ka sngi nga khmih lynti ba phin sa tip halor ka jingbhah kam”.
Haba kylli kane kan dei syndon ka jingpynkut ia ka jingbate shuki myntri, u Myntri Rangbah ula ong, “Peit ha ka politik kadei kaei kaei kaba lah ban pait ban pra bad bun kiei kiei ki lah ban jia. Ngim shim la poi pyrkhat ba kum kane ka jinglong jingman kan wan jia hynrei kala wan jia pat. Kumta ngan ym kyntait eiei. Hooid lada ka jinglong jingman ka neh hi kumjuh, ngim khmih lynti ban jia eiei shuh ia mynta. Ngi khmih lynti ba kane ka sorkar bad kine ki myntri kiba mynta kin pyndep ia ka samoi treikam ka jongki”.
Haba kylli la u don jingthmu ban pynrung ruh ia kiwei pat ki MLA ha ka kynhun Myntri, ula ong “Lada nga ioh ban pynrung sa 5-6 ngut shuh shuh ki myntri sorkar bad lada ka riti synshar ka ri ka ailad ia nga, kumta ngan pynrung shuh shuh ia kiwei pat ki myntri sorkar, hynrei kumba phi tip, ka don ka jingbuh ia u pud ha kaba iadei bad ka nombor jong ki myntri, kumta ngi hap ban trei ha ka rukom jong ka jingdon 12 ngut baroh. Kumta ka long kaba suk bad kam long kaba lah ia ngi ban pynrung shuh iano iano ruh na kano kano ka seng sain pyrthei ne wat na ka seng NPP ruh ha kane ka kynti kaba mynta”.
