Kyntait ka Sorkar ia ka ram T.200 ba khlem sut ban tei ia ka USTM Medical College : Wailad

Shillong, Jylliew 29 : U Myntri ka Koit ka Khiah Bah Wailadmiki Shylla ha ka sngi Nyngkong, ula pynthikna ba ka Sorkar Jylla kala kyntait ia ka jingtyrwa ba pan ram ba khlem sut ka University of Science Technology Meghalaya (USTM), ka ba kot T.200 klur na ka bynta ban tei ia ka PA Sangma International Medical College & Hospital (PIMC).

“Haba sdang kala don ka jingiakren, hynrei hadien ka Sorkar kala kyntait ia ka. Kam don satia kano kano ka jingkyrshan” ong u Bah Wailad haba iakren bad ki nongthoh khubor kiba kylli shaphang kane ka jingtyrwa ka USTM.

Ula pynshai ba ia kane ka rai la shim da ka jingialang ba hashuwa jong ka Kynhun Myntri.
“Ha ka jingialang ba hashuwa jong ka Kynhun Myntri, Ngam pat don bynta ha ka. Hynrei ka rai bala shim ka long ban kyntait ia ka jingtyrwa ban ai ram ba khlem sut sha ka USTM” ula ong.

Namar ka jingbym tip ia kiei kiba la iakren ha ka jingialang, u Bah Wailad ula kdew ia ka jingduna pisa lehse ka lah ban dei ka daw.

“Ngam pat don bynta ha ka Kynhun Myntri ha katei ka por, kumta ngam da tip bha ia kaei kaba iakren. Hynrei ka lah ban don ka don kaba shonghok. Ka Meghalaya kam dei ka Jylla kaba tam ka jingpynmih pisa, ngi dei kaba duna ka jingpynmih pisa” ula ong.

“Ngi don ruh ia bun kiwei ki kam ba kongsan ba hap ban pynleit jingmut bad ban kynshew. Naba ka USTM ka dei ka jaka pule shimet, ka Sorkar ha katei ka por lehse ka lah ban sngew ba ka la ban pynioh ia ka pisa lane kyrshan pisa na kiwei ki thymmei. Nga tharai ka dei kata ka daw ba ka Sorkar kala shim ia ka rai” ula bynrap.