Shillong, Jylliew 25: Ka Polo, Shillong naduh ka sngi Thohdieng kan sa kylla long ka jaka pdeng kaba ki paitbah kin lah ban peitkai ia ka jingialehkai Football World Cup 2026, ha kaba ka Sorkar Jylla kan plie ia ka ‘Chief Minister’s Football Fan-Park’ ban peit ‘Live’ ia ka FIFA World Cup 2026 na ka bynta ki paid ba ieid ia kane ka jingialehkai.
Ia kane ka jaka peitkai ia ka football jong ka World Cup yn pynieng ha S.R.G.T Parking Lot bad ia kane ka Fan Park yn plie ha ka 26 tarik u Jylliew.
Kan ym don kano kano ka jingshim pisa na ki paitbah kiba leit peitkai bad ka sorkar kala ong, ba katei ka jaka kadei da ka jingthmu ban lumlang ia ki nongieid ia ki jingialehkai ban ia peitlang ia ka jingkhun kaban long ruh kum kata ka jingiasyriem jong ka jingshongshit bad kito kiba peitkai ha ki madan ialehkai.
Na ka bynta ka bit ka biang jong ki nongshong shnong, yn pyni Live ia ki jingialehkai kiba tang ha ka por 9:30 Mynmiet, 10:30 Mynmiet bad 12:30 dang step phyrngab ha ka Screen kaba heh bha.
Ka jylla kan pyniasoh lang ruh ia katei ka jingpeitkai ia ka football ryngkat bad ka tem ka put ia kaba yn pynshongshit da ki nongrwai abd ki kynhun hapoh jongka Chief Minister’s Meghalaya Grassroots Music Program (CM-MGMP), ban pynlong ia ka tei ka Park kum kaba iakhehlang ia ka jingialehkai bad ia ki jingpynbyrngia.
Ki ophisar kila ong, ba kane ka sienjam kadei shi bynta jong ka jingthmu kaba iar ban pynbiang ia ki jaka na ka bynta ki paitbah ha kaba iadei bad ka kam ialehkai bad ka jingdon sap ki samla ka jylla.
“Kane ka pyni ia ka jingiengskhem ban buh ia ki jaka paitbah kiba biang ban rakhe ia ka football, ka tem ka put bad ka jingiatylli” la ong ka tnad Tourism ha ka kyrwoh.
Kane ka Fan Park kadei ruh ka jingiateh halor ka jingthmu ka jylla ban tei ia ka football stadium kaba heh tam ha ka ri hapoh Mawkhanu.
Da kaba pynkylla ia ka jaka pynieng kali sha ka jaka pdeng ban peitkai ia ka World Cup, ka sorkar ka kyrmen skhem ba kane kan pynshongshit ia ki riewieid football ka Meghalaya bad ba ki paitbah kin ioh ia ka lad ban peit ia kane ka lympung ialehkai football ha ka pyrthei bad ia ki nongwankai khlem da donkam ban shim tiket.
La iawer ia ki riewieid football ba kin wan ha ka 26 tarik ban iadonbynta ha ka jingialam ka Shillong ha ka jingrakhe ia ka World Cup.
