Shillong, Jylliew 25 : Ka Infrastructure Summit ba arsngi ka Meghalaya ka dei kaba la pynwandur ban wanrah lang ia ka Sorkar Pdeng, ki Jylla ka thain Shatei Lam Mihngi bad ki karkhana/ kompani ha kawei ka kamra ban iakren hok halor kiei kiei, ym ban beh ia ka jingkynshew kam ne iateh kular, ong u Commissioner & Secretary Sanjay Goyal ha ka sngi Palei.
“Ka jingthmu jong ka Sorkar Jylla ka long ban wanrah lang ia ki kynhun bapher bapher ha kawei ka rynsan bad kam dei satia ka Invester summit, ta ka daw ngu khot ka Infrastruture summit” ong u Goyal.
U iathuh ba kane ka jingialang kala wanrah ha kawei ka jaka ia ki Ministry ba kongsan ka Sorkar India, ki Tnad na ki Jylla ka thain Shatei Lam Mihngi bad ki nongmihkhmat na ki karkhana bad kompani bapher bapher.
“Ngi pyrshang ban wanrah ia ki ha kawei ka rynsan bad lada phi iohi ia ki jingialang kaba ngi la phiah ha kine ki arsngi, la pynwandur ia ki ba kin iaid tang ki jingiakren” ula ong.
Ki jingialang ki dei kiba la pynbeit tang halor ki lai tylli ki mat ba kongsan : ban peit ia ki bor jong kawei pa kawei ka Jylla, ban peit ia ki jingkwah jong ki karkhana/kompani bad shong bishar ia ki skhim ka Sorkar pdeng na kaei kaba kwah da ki Jylla ka thain Shatei Lam Mihngi.
U Goyal ula ong ba ki Ophisar bala rangbah na baroh ki Ministry ba shah khot sngewbha, kila iashimbynta ha kine ki arsngi. “Baroh ki Ministry ba ngi la iakren, kila phah ia ki Heh Ophisar, kila iashong ha man ki jingiakren bad pyniaid ia baroh ki jingiakren. Kane ka dei ka jingthmu ba hakhmat eh” ula ong.
Ka thong kaba kham heh ka long ban weng noh ia ki jingsgewthuh bakla halor ka jingkynshew kam hapoh ka thain.
U Goyal u pyntip ba ka kaiphod jong ka Summit kala don hapdeng ka jingpynkhreh ban buh jingthoh lut ia baroh ki jingshem.
Halor ka jinglong jingman ha ka jingkynshew kam, u Goyal u ong ba ki jingsngew mynta kila kylla.
“Haba phai sha ki jingkynshew kam ha ki khyndiat snem bala leit, nga sngew ba ki jingmut jingpyrkhat kila kylla bun shah, ka Sorkar kala lah ban iarap ha kiba bun kiei kiei” ula ong.
Ula kdew ia ka Meghalaya Investment Promotion Policy bad ka Act na ki arsnem bala leit noh : “Lada phi khmih ia ka Investment Promotion Policy bad ka Act kaba ngi la pynlong ain arsnem mynshuwa, ka kren ia baroh ki jingiarap hynrei kaei kaba ngi khmih shakhmat ka long ba ai ba ki briew kin wan bad sngewthuh, ai ba ki briew kin wan bad iohi, la kine ki jingiarap ki treikam ne em lane tang ha ki kot ki sla”.
Kawei na ki mat ba kongsan kaba mih ka dei ka jingpynioh ram ia ki MSME.
