Shillong, Jylliew 25 : Ka Tnad Bording ka Jylla kala thung ia ka Committee hapoh u Chief Engineer, West Zone ban shong bishar ia ki mat bala pynsngew da ka SAI Computer Ltd, ong u Commissioner & Secretary ka Tnad Bording Sanjay Goyal ha ka sngi Palei.
Haba kylli halor kane ka kam, u Goyal ula ong ba ka Tnad ka dang ap ia ka jingshem jong ka Committee.
“Ngi la thung ia ka Committee hapoh u Chief Engineer ka West Zone kum u Chairman. To ngin ia ap ia ka kaiphod” ula ong haba bynrap ba na ki jingai jingtip ba malu mala na u Chief Engineer ki kdew sha ki jinglong jingman na ki thain.
“Kaei kaba la iathuh ia nga da u Chief Engineer dang shen ka long ba katto katne na ki jingeh ki dei halor ka jingsam ia ka bording bad ia kane la pynbeit namar ka jinglong jingman ha I thain bad ka suinbneng bad katto katne ki jingeh ba iadei bad ka jingai bill” ong u Goyal.
U Goyal ula kular ba ia ki jingeh jong ki nongthang bording yn sa pynbeit noh haba pynshong nongrim na ki jingshem jong ka Committee.
