Shillong, Jylliew 25 : Ka Tnad Bording ka Jylla kala pynlong ia ka jingkhmih bniah ba man ka sngi ban tehlakam ia ka kam tuh bording bad u Commissioner & Secretary ka Tnad Sanjay Goyal ula ong ba kane ka jingleh ka lah ban duna hynrei ka ktah bha ia ki nongthang bording kiba leh hok.
U Goyal ula ong ba ka Investigation Wing jong ka Tnad kala treikam ha baroh kawei ka Jylla, ym tang ha ki katto katne ki jaka ka ri-lum Garo.
“Ngi don ia ka Investigation Wing, ym tang ha ka thain ri-lum Garo kiba don khyndiat eh hynrei ha baroh kawei ka Jylla. Ngi khmih bniah ia kane man la ka sngi” ula ong.
U Goyal ula ong “Kane ka dei ka jingduhnong ba long beit beit ia ka Corporation bad lyngba jong phi, nga kwah ban kyrpad ia ki paidbah ba kito ki nongthang bording ba leh hok, ki mad ia ki jingeh namar kine ki kam beain bala leh da ki katto katne ngut. Ka jingtuh bording kam dei kaba bun hynrei ka Tnad kala leh ia kaei kaba donkam haba ka lap ia kine ki kam”.
“Ka wanrah ia ka jingduhnong ia ka Corporation bad ka wanrah ruh ia ka jingkit kaba khia ha ka pisa pilain ia ki nongthang bording ba siew hok namar kin don beit kiba shah ktah” ula ong haba bynrap ba ka tnad kala buddien ia kiba tuh bording bad kan phah siew ia ki jingduhnong.
Ka Tnad kala kyrpad ruh ia ki nongthang bording ba kin pyntip lada lap ia kano kano ka jingtan tuh ia ka bording khnang ba kan ym ktah ia ka jingai jingshakri bad ka jingsiew bai bording.
