Dimapur, Jylliew 25: Ka jingpang African Swine Fever (ASF) ka la saphriang sha Dimapur, ha kaba ki bor synshar district ki la pynbna ïa ka Thahekhu Block-7 kum ka jaka ba la ïoh ïa ka jingpang hadien ba la pynshisha da ka Laboratory ïa ka jingpang kaba saphriang bha ha ki sniang, kaba la pynmih ïa ki jingsngewkhia halor ka jingsaphriang kaba kham heh ha kylleng ka Nagaland.
Ha ka hukum ba la pynmih ha ka sngi Palei, u Deputy Commissioner u Dr Tinojongshi Chang u la ïathuh ba u Chief Veterinary Officer (CVO) ka Dimapur u la pynthikna ba ki sniang ki don ïa ka jingpang ASF ha Thahekhu Block-7. Kane ka jingpang kaba ktah ïa ki sniang ba ri ha ïing bad ki sniang khlaw, ka kit ïa ka jingïap kaba jan 100 percent bad kam don dawai ban pynkoit, watla kam don jingma ïa ka koit ka khiah jong u briew.
Ka bor pyniaid district ki la khang pyrshah ia ka jingleit jingwan jong ki sniang, ki khun sniang, ka doh sniang, ki mar sniang, ki jingbam, ki tiar bad kiwei kiwei ki tiar kiba lah ban don ka jingpang shapoh bad shabar jong ka jaka ba shah ktah.
La bthah ïa u CVO ban shim khia ïa ka jingpeitngor, ka jinglum nuksa, ka jingpynkhuid bad ka jingpynïap khniang ha kano kano ka jaka kaba donkam katkum ki kyndon jong ka Sorkar India, katba ïa ki pulit bad kiwei kiwei ki bor la bthah ban pyntreikam ïa ki lad jingïada.
Ka jingpur kaba khatduh ka wan tang hadien shi taiew ba la lap ïa u ASF ha ka shnong T. Khel Model Village ha Khikha Colony, Kohima, ha ka 19 tarik u Jylliew.Na ka liang ki bor ba dei khmih ha katei ka thian kila pynbna ia ka jaka ba don jingpang kaba jngai shi kilomitar bad ka jaka peitngor kaba 10 kilomitar, nalor ba la khang ia ki iew sniang bad khanglad ia ka jingleit jingwan jong ki sniang kiba im bad ki doh sniang.
Ka jingpur stet jong ka jingpang ha ki ar tylli ki jaka sor bah jong ka Nagaland ka la pynmih biang ïa ka jingtieng hapdeng ki nongri bad ki nongkhaii, ha kaba bun ki sngewkhia ba kane ka jingpang ka lah ban saphriang sha kiwei pat ki distrik bad pynmih sa kawei pat ka jingduhnong kaba shyrkhei jong ki jingri.
Na ka bynta ki hajar tylli ki longïing ha Nagaland, ka jingri sniang ka long ka lad jingim kaba kongsan ha ka liang ka ioh ka kot, bunsien ka long kum ka jingbuh pisa ha ka ïing ka sem, ka lad ban ïoh pisa na ka bynta ka jingpule bad ki jingdonkam ba kyrkieh ha ka liang ka koit ka khiah, bad ka nongïarap ba kongsan ha ka ïoh ka kot jong ki nongkyndong.
Da kaba pynthikna mynta ïa ka ASF ha baroh ar tylli ki Kohima bad Dimapur, ka jingsngewkhia ka nang kiew halor ka jingpynkhreh jong ka jylla ban teh lakam ïa kane ka jingpang shwa ba kan saphriang shuh shuh.
Ka bor synshar district ki la kyrpad ia ki nongri sniang, ki nongkhaii bad ki nongkit ba kin iatreilang bad ki heh jong ka tnad veterinary, ban pyntip mardor ia ka jingiap sniang kaba pher bad ban pynkhlain ia ki lad jingiada (Biosecurity) ban iada na ka jingsaphriang shuh shuh jong kane ka jingpang.
 ka la saphriang sha Dimapur, ha kaba ki bor synshar district ki la pynbna ïa ka Thahekhu Block-7 kum ka jaka ba la ïoh ïa ka jingpang hadien ba la pynshisha da ka Laboratory ïa ka jingpang kaba saphriang bha ha ki sniang, kaba la pynmih ïa ki jingsngewkhia halor ka jingsaphriang kaba kham heh ha kylleng ka Nagaland.){kind=link}