Guwahati, Risaw 11 : Ka jingshlei um ba kynsan kynsan jong ka Wah Budhi Gandaki ha Nepal, kala rong ia hynriew tylli ki jingkieng bad kumba 35 tylli ki iing ha Gorkha District, kaba lam ruh sha ka jingjah rngai haduh 10 ngut ki breiw nalor ka jingpyndkut ia ki surok kiba pyniasoh sha bun tylli ki Shnong.
Ka jingshlei um kala pynjulor ia artylli ki jingkieng iaid kali bad saw tylli ki jingkieng doi doi, ong ka kaiphod. Kane ka jing shlei um kala pynjulor klai bha ia ki iing ki sem, ki surok bad ki jingtei pynmih bording.
Napdeng ki jingtei ba la julor ki dei ka jingkieng ba pyniasoh ia ka Rughat ha Gorkha bad ka Tripurasundari ha Dhading bad ka Soti bad ka Manbu ha Arughat. Ka jingkieng Bailey ba pyniasoh ia ka Ward 1 bad 3 ka Dharche Rural Municipality ruh kala shah rong.
Bun tylli ki jingkieng doi doi, kynthup kito kiba pyniasoh ia ka Machhikhola bad ka Kerauja, Thado Bharang bad ka Jagat, lem bad ka Ghatt e Khola bad Philim, kila shah pynjulor.
Kane ka jingshlei um kala rong ruh haduh 35 tylli ki Iing ha ka Shnong Paiyu bad Bagar jong ka Chumnubri Rural Municipality-3. La pyntip ruh ia ki jingjulor na ka shnong Gagat, Selleri, Dobhan bad Ghatt e Khola.
Kawei ka jingkieng doi doi ba pyniasoh ia ka Nyakchet bad Sirdibas kala shah rong noh. Ha Sirdibas, kawei ka IIng jong u Ram Bahadur Gurung kala shah rong noh.
Ha Macchikhola, ka um kala rung sha ki Iing kiba don ha ki jaka them kaba ktah ia kumba 5 haduh 7 tylli eiei. Kumba 20 haduh 22 tylli ki Iing ha Salleri la pyntip ba kila don hapdeng ka jingma.
Ka Hydropower project ba dang pyntrei mynta ha Sahaj Urja, ha Salleri kala shah rong noh ha ka umsaw ha ryngkat bad kumba 7-8 tylli ki Iing, ong ka kaiphod.
Wat hapdeng kine ki jingjulor, ki jaka ai jingsumar ha Philim, Salleri, Jagat bad Macchikola la pyntip ba kila lait na ki jingma namar ka jingdon ha ki jaka ba long lum.
