Shillong, Risaw 11 : Ka Khasi Students’ Union (KSU) kala dawa ia ka Tnad Public Works Department (PWD) ban weng ia baroh ki jingshna pandal bad ki jingtei ba shipor ba pynieng ha ki surok PWD, haba pynpaw ba kine kila pynthut ia ka iaid ka ieng bad wanrah jingeh ia u paidbah.
Ha ka shithi sha u Chief Engineer ka PWD ha ka sngi Palei, ka KSU kala ong ba ia kane ka ujor la aiti hadien ka jingioh pdiang ia shibun ki jingeh na ki kynhun bapher baoher bad ki riew paidbah.
“Ia kane ka shithi ujor la aiti hadien ka jingioh pdiang bun ki jingujor na ki kynhun bapher bapher bad ki paidbah ba iadei bad ka jingthut bad jingpynwit da kine ki jingtei ha surok PWD. Kine ki jingeh kila wanrah ia ka jingeh ha ka iaid ka ieng jong ki kali bad ki paidbah, khamtam ha ki jaka kiba ki surok ki long kiba khim” ong ka KSU.
Haba pynpaw ba ka sngewthuh ba ia kum kine ki jingtei ba shipor lah ban pynieng na ka bynta ki kam bapher bapher, ka Seng ka pynpaw ba ia ka jingshngain u paidbah da lei lei ruh ym lah ban iapein.
“Ka long kaba kongsan ba kim dei ban pynthut ia ka surok paidbah lane iapein ia ka jingshngain jong ki paidbah” ong ka KSU.
Ka KSU kala kyntu ia ka Tnad PWD ban pynthikna ia ka jingbud ryntih ia ki kyndon ba thikna hashuwa ban ai jingbit ia kum kine ki jingtei ha ki surok paidbah.
“Namar kine ki jingujor ba man ka por, ngi kyntu ia ka Ophis jong phi ban khmih ia kane ka kam bad ban shim ia ki sien jam ba donkam na ka bynta ban weng ia ki jingtei pandal bad kiwei ki jingtei ba shipor kiba pynthut ia ka surok PWD bad ban pynthikna ia ka jingbud ryntih ia ki kyndon hashuwa ban ai jingbit ia kum kine ki jingtei ha ki surok paidbah” kala ong.
“Ngi kyrmen ba ki bor ba dei khmih kin shim ia ki sienjam ba donkam kham kloi kat kaba lah na ka bynta ka jingmyntoi ka jingshngain u paidbah” bynrap ka KSU.
