Shillong, Risaw 11 : Khatar snem hadien ka jingkhang dam ka NGT ia ka jingtih dewiong ha Meghalaya, ka Jylla kala nang jam sha ka jingioh sdang tih par biang da ki kyndon.
Ka kynhun ki stad ki jhad jong ka Coal Ministry ha ryngkat ki Heh ka CMPDIL bad DGMS, kila leit hiar jurip ia ki par dewiong ha East Jaintia Hills bad Khasi Hills ha ka taiew bala lah, pyntip ka Directorate of Mineral Resources ha ka sngi Saitjain.
Ia kane ka jingjurip la pynbeit da ka State Directorate bad ka dei shibynta jong ka jingiakren hapdeng ka Shillong bad ka Delhi ban lah pyntreikam noh ia ki par kiba rit bad ka jingtih da ka jingstad saian.
Kane kala urlong ruh hadien ba u Myntri Rangbah Conrad K Sangma ula iakynduh ia u Myntri ka Coal Ministry G Kishan Reddy ha New Delhi ha ka 7 tarik Naitung, bad pynsngew ia ka jingeh jong ki longiing ba shaniah na ka kam tih dewiong, kiba la shah ktah jur naduh ka jingkhang tih par ha u snem 2014.
Ha kane ka jinghiar jurip, kane ka kynhun na Delhi kala khmih bniah ia ka rukom tih par ha Jylla bad bishar ruh la ka long ne em ban pynsdang biang ia kane ka rukom tih par haba khmih ia ka jingshngain bad ka jingneh, kaba long kat kum ka ain.
Hadien kane, ha ka jingialang bad ki Heh Ophisar ka Jylla, ka kynhun kala iakren ia ki jingeh bala mad da ki nongtih par ka Jylla bad kaei ka model ba donkam ha kaban tih par da ka jingstad saian ha Meghalaya-ka ban pynwandur kat kum ka rukom long ki jaka bad ka jinglong trai ia ka jaka da ki riew shimet bad ki shnong ki thaw.
Haba iai ban ia ka nongrim jong ka Sorkar, u Myntri Rangbah ula ong “Ka Sorkar jong ngi kala kut jing mut ban wad ia ki lynti kiba lah ban pyndonkam ha kaban sdang biang ia ka jingtih dewiong ha Meghalaya, haba pynbiang tarajur ia ka jingkiew ka ioh ka kot bad ka jingkitkhlieh na ka bynta ka mariang. Da ka jingiatreilang bad ka Ministry of Coal bad ki nongtih par na Jylla, ngi lah ban thaw ia ka ain ka ban pynthikna ia ka jingtih par kaba neh, kaba shngain bad kat kum ka jingstad saian”.
Ka Sorkar ka pyntip ba ka khmih lynti ba kin sa dong biang ki jingwan khmih bniah bad ki jingiasyllok ha ki taiew ban wan katba ka Directorate of Mineral Resources ka dang bteng ban iatreilang bad ka Sorkar Pdeng ban pyniaid shakhmat ia ka kam.
