Shillong, Naiwieng 04 : Ki bor district ka East Khasi Hills ha ka step sngi Balang, kila leit ban plie biang ia ka jaka ba pynieng ia ka Lower Terminal Point jong ka Shillong Ropeway project ha Madan Laban, kaba la khang tala da ka Khasi Hills Autonomous District Council ha kine ki khyndiat sngi bala leit.
Ki Magistrate ryngkat ka jingsynran ki Pulit, kila poi sha katei ka jaka bad kyndang ia ka tala bala khang ka KHADC ha ka khyrdop bad ka Ophis treikam jong ka kompani, da kaba pyndonkam ia ki tiar kyndang.
Ka KHADC kala khang tala ia kane ka jaka treikam naduh ka 27 tarik Risaw, haba kynnoh ba ka kompani ba pyntrei ia ka project, kala treikam khlem da ioh ia ka Trading Licence.
“Mynta ka sngi ha ka por 11 baje mynsteo, ki Magistrate ka East Khasi Hills ryngkat ki Pulit, kila kyndang ia ki tala ba khang ha khyrdop bad ka Ophis treikam jong ka kompani ba pyntrei ia ka Roeway kaba donn hapoh ka Lower Terminal Point, Madan Laban” ong ki bor district.
Hadien bap lie biang ia kane ka jaka, ki bor district kila buh ia ki bor pahara ban khanglad ia kino kino ki jingjia.
Shuwa kane, ka Tnad Tourism kala ujor ejahar pyrshah ia u Inspector ka KHADC namar ka jingleit khang beain ia ka jaka treikam kaba dei jong ka Sorkar.
