Shillong, Jymmang 29: Ki trai bad dorbar kali kitkamai kynthup ki trok kitmar jong ka Meghalaya kila ong baka rai jong ka Kynhun Myntri Sorkar ban map noh iaka kuna ba kot T.900 klur naki kali ka dei ka rai ka ban sah jingkynmaw namar ka Sorkar Meghalaya ka dei ka Sorkar Jylla ba nyngkong eh hapoh ka Ri India ban shim ia kum kane ka rai.
Ka Joint Action Committee jong ka All Meghalaya Commercial Vehicles Forum ka la ong ba katei ka rai jong ka Sorkar ka wan hadien ka jingdawa bunsien, kynthup ia ka shithi jingpynkynmaw ba la phah shaka Sorkar ha ka 18 tarik Jymmang bad ha ka 26 tarik Jymmang.
“Hadien u bnai ba nyngkong jong u snem 2026, hadien ka jingpynkynmaw kaba lai ha ka 18 tarik Jymmang bad ka jin gpynkynmaw kaba khatduh ha ka 26 tarik Jymmang, ngi dap da ka jingkmen kaba khraw bad ka jingsngewnguh iaka Sorkar Jylla, ba mynta ka sngi, ngi kiba don bynta haka kit iaki mar mata na kylleng ki bynta jong ka Jylla, ngi dap daka jingkmen haba iadei bad ka rai jong ka Kynhun Myntri Sorkar” ong u nongaiktien ka AMCVF Bah Soomeyo Sayoo.
Katkum ka jingong u Bah Soomeyo, ka rai jong ka Kynhun Myntri Sorkar ka iarap ia baroh, naduh ki trai haduh ki Dribar kali kamai bad kali kit mar mata.
“Kane ka Sorkar kam shym la ïarap tang ïa ngi kiba don ïa ki kali heh, ka la ïarap ïa kiba don kali rit, ki kali Tourist, ki Bolero Pickup, ki Trok bad kiwei kiwei, khamtam na ka liang jong ngi, ki Exporter bad ki Importer kumjuh,” u la ong.
U Bah Soomeyo ula ai ka burom ia u Symbud Myntri Rangbah ba khmih iaka tnat Transport u Bah Sniawbhalang Dhar uba ka shimkhia ban pynurlong iaka jingdawa jong ki. “Kane ka dei ka sngi kaba ngin ïai kynmaw. Kadei ka histori ba la thaw da u Symbud Myntri Rangbah u Bah Sniawbhalang Dhar. Ngi lah ruh ban khot ïa kane ka rai kum ka Master Stroke namar ha kylleng ka Ri India, kane ka dei ka sien kaba nyngkong ba ka Sorkar Jylla kan shim ïa ka sienjam ban pyllait ïa ka kuna kaba T.900 klur ka khajna kaba dei ban siew daki paidbah shaka Sorkar” ula ong.
Haba ïaroh ïa ka rukom treikam jong ka Sorkar, u la bynrap, “Kane ka dei ka Sorkar kaba nyngkong eh ha ri India ban pyrkhat na ka bynta u duk, u suk, u sem shilliang, u kup shilliang. Nga dap daka jingkmen bad ngi iaroh ia u Symbud Myntri Rangbah u Bah Prestone Tynsong, khamtam ia u Bah Sniawbhalang Dhar, u briew uba don ka jingieid bad jingtip lem iaki paidbah”.
Ka JAC ka la kdew ba ka Sorkar kala ai ka jingmynjur khamkloi hapdeng ka jing khmih lynti ki trai bad dribar kali kamai. “Ngi dang khmih lynti ba ngin ioh khubor ba sngewtynnad ha kaba kut jong une u bnai hynrei ka dei ka jingkyrkhu kaba khraw ia ngi, ngi kiba don bynta ha ka leit ka wan, ka kit mar mata ha surok, ba ka Kynhun Myntri Sorkar ka la mynjur ban mab noh iaka kuna jong ngi” ula ong.
U la kubur ia ka jingduh khajna ia ka Sorkar bad iaka Jylla. “Ngim pat ju iohsngew ba ka Sorkar kan pyllait ia ka kuna kaba dei ka khajna ba ka dei ban ioh, ka long ka jingduhnong kaba khraw ia ka Sorkar haduh T.900 klur, khamtam ba ka jylla Meghalaya ka dang duna bha ki lad ban ioh lum khajna” u la ong.
Hapoh kane ka jingpynbeit thymmai, ki trai bad dribar kali kin siew tang shi bynta na ka kuna ba kidei ban siew. “Lyngba ka jingstad bad jingsngewthuh jong ki nongïalam jong ngi, ki la ailad ïa ngi ban siew tang 10% jong ka Fitness bad 20% jong ka Tax” ula ong.
Ka Forum ka la kyntu ia ki trai bad dribar kali ba kin pyndonkam ia ka kabu ban pynbeit ryntih bad pynthikna ban siew tista iaka bai pynthymmai kot kali bad ka Tax kali. “Nga kyrpad ïa baroh ki trai kali naduh ki Alto 800, ki kali tourist, ki pickup, ki trok bad ki kali kamai baroh — ba kin shim ïa kane ka kabu ksiar ban pynkhuid noh iaka ba dei ban siew iaka bai pynthymmai kot bad ka Tax jong ki kali nangne shakhmat khnang ba ngi ruh ngin lah ban noh synñiang sha ka roi ka par bad ka jingkyntiew shaka ioh ka kot jong ka Jylla bad ka Sorkar jong ngi,” u la ong.
Haba pyniadei ia ka kam kit mar mata kum ka jingkyntiew iaka ioh ka kot jong ka Jylla, u Bah Soomeyo u la ong, “Ka jingkiew jong ka Jylla jong ngi ka shong ha ngi, ki trai trok bad ki kali kamai. Lada ngi peit ia ka kam jngohkai pyrthei, ka kam jngohkai pyrthei ruh ka kiew ba don ki kali kamai. Lada ngi peit ia ka kit ka bah, dei ki trok kiba pynpoi ia ki mar ki mata.”
U la pynshong nongrim ia ka jingjop jong ki trai bad dribar kali ha ka jingtreishitom u Bah Sniawbhalang Dhar. “U Bah Sniawbhalang u ju kyntu, u ai jingmut bad pyni ia ngi kumno bad ha kano ka rukom, bad u pan jingmut ruh na ngi kumno ban wanrah ia kum kine ki lad ki lynti, haduh ba ngin poi sha kane ka jingjop, ka dei lyngba ka jingpyrshang bad ka jingbuddien ba man ka por jong u Bah Sniawbhalang Dhar” ula.
