Shillong, Nailar 31: Ha ka jingkylla na ka jingialap “Em ia u Droks” sha ka “Jingiada da ki Kam”, ka DREAM Mission kala pynrung ïa ki 22 ngut ki samla kiba la shah ktah, ban ioh ia ki jinghikai ha ka Vocational Training hapoh ka sienjam ba thymmai jong ka DREAM YOUNG.
Kane ka prokram ka pynleit jingmut kyrpang ïa ki khynnah kiba la pep skul shiteng por bad ki samla kiba wan na ki longïing kiba duk bad mad jingeh.
Katkum ka kyrwoh, , 69 ngut ki samla la ithuh da ka Seng Kynthei Katholic, Zone 2 bad ha u Ïaïong 2026, la leit ialam ïa ki sha ka Skill Centre na ka bynta ban ioh jinghikai halor ki Vocational Course ki bapher bapher.
Hadien ka jingïasyllok bad ka jingkyrshan na ka ITI Shillong, Don Bosco Technical School bad Don Bosco Youth Centre, 22 ngut na kine ki samla kila dep pynrung ha kaban ioh jinghikai pyntbit bapher bapher.
U Director jong ka DREAM, u Bah Francis Kharshiing, ula ong ba ka jingthmu ka long ban ai ïa ki samla ïa ka daw, ban ong “hooid” ïa ka jingim lyngba ki sap bad ka jingïoh kam, ha ka jaka tang ba kin shu “ong em” ïa u drok.
Ula ong ba kane ka jingai jinghikai kan pynlong ïa ki samla ban long kiba laitluid ha ka liang ka ïoh ka kot bad ban pynduna ia ka jingngop ha ki jingdih kiba sniew. Ïa kane ka sienjam la pyniaid shakhamt da kaba ïatreilang bad ka Meghalaya State Skill Development Society bad kiwei pat ki jaka ai jinghikai pyntbit.
Ka Mission kala phah ruh da ka jingthoh sha baroh ki Deputy Commissioner ban khmih bniah ïa ka jinglong jong ki ITI ha ki district ki jongki bad ban pynkhlaiñ ïa ki, da kaba pynpaw, ba ki sap, ym tang ki degree, ki plie lad sha ka jingioh kam bad ka jingseng kam lajong.
Ka bynta kaba bud, jong ka jingpynrung kyrteng bad ka jingiasyllok kan long ha ka sngi Baar ha ITI Shillong ha ka 2 tarik u Nailur, ha ka por 10 baje mynstep.
Ka Mission kala ong, ba kane kadei tang ka jingsdang jong ka sienjam treikam kaban iaineh lyngba ka jingshim ia ki lad bad ki kabu ki bapher.
