Shillong Jymmang 29: U Kyrtong ka UDP ban iakhun ia ka elekshon shiteng samoi jong ka MP Lok Sabha Bah Vivanstone G Kharngapkynta ha ka sngi Palei, ula ong ba ka Sixth Schedule ka long kaba khlain bha ban iada ia ka ri-lum Khasi bad Jaintia bad dei ban pynkhlain shuh shuh ia ka bad ban kyntait ia ka jingdawa ban pynmih bujli da ka Article 371.
Haba kren hadien ba la pynbna kum u kyrtong ka UDP, une u nongiasaid aiñ uba la rangbah ha ka kam ula ong, “Nga ai khublei ia u Bah Metbah. Kane kadei ka sien kaba nyngkong eh ba ngan rung ha ka jingiakhun ia ka elekshon”.
U Bah Kharngapkynta, uba la don ka jingiadei bad District Council kum u nongiasaid ain lah jan 30 snem, ula maham ia ka jingshah tynjuh jong ki Autonomous Council.
“Haba ngi lah don ia ka Sixth Schedule, haba ngi lah don ia ki District Council, ngi dei ban trei shitom ban ialeh ban pynkhlain shuh shuh ia ki District Council,” ula ong.
“Mynta kala don ka jingtlot bor jong ki kam kashari hapoh jong ki District Council namar ba ki kashari kiba treikam man la ka por kim ju phah shuh ia ki mukotduma kiba iakajia hapdeng ki bym dei ki Khasi, namar ba ka don ka bor kaba nabar ban pyntlot ia ki District Council Court.”
Ula maham halor kane ka jinglong jingman da kaba ong, “Ki lah ban don ki jingpyrshang ha ki snem ban wan ban pynduh bad ban weng noh ia ka District Council bad nga sngew ba kaei kaba lah don lypa yn ym lah ban pynduh ha kano kano ka rukom ruh”.
Halor ka jingiatai halor ki kyndon jong ka riti synshar ka ri, u Bah Kharngapkynta ula ong, “Kila don ruh ki seng kiba kwah ban wanrah ia ka kyndon kyrpang jongka Article 371. Nga sngew ba kane kadei tang ka jingmutdur ka bym lah ban long. Ngi don ia ka Sixth Schedule, kadei kane kaba ngi hap ban pynkhlain shuh shuh”.
Ula pynpaw ruh ia ka jingsngewkhia halor ka jinglah ruh ban pyniar ia ka 73rd Amendment sha ka thain. “Ka don ruh ha ka jingmut jingpyrkhat ka jong nga ba ngi dei ban pynkhlain ia ka Sixth Schedule namar ba nga sheptieng ba lada ngi ioh ia ka 73rd Amendment, kaba dei ka Panchayati Raj, shisien ba ka jingsynshar ka Panchayati Raj kala wan, ki Syiem bad ki Hima kin sa duh noh namar kan ym don shuh da kawei pat ka rukom treikam ha ka kam synshar bad kane kan pynmynsaw” ula ong
“Lada nga long kum u MP, namar ba nga tip ia ka rukom treikam jong ki District Council, ngan trei shitom na ka bynta ki District Council. Haba nga trei shitom, ka mut ngan trei shitom na ka bynta ki Hima jong ki Syiem, ki Wahadadar bad ki shnong, namar ba nga lap ba dei tang lyngba ki District Council, lyngba ki Syiem bad ki shnong, yn lah ban pynkhlain ia ka hok tynrai jong ka jaidbynriew”.
U Bah Kharngapkynta ula ong, ba ka jingpyni kaba skhem hapoh ka Parliament kan donkam ia ka jingitreilang palat ia ka jylla. “Ngi donkam ia ka thong kaba kumjuh ban wanrah ne ban pynbor ban pynrung ia ka ktien Khasi ha ka Eighth Schedule. Ngim lah ban leh marwei, kadei ban don ka jingiatreilang kum ka kynhun” ula ong.
Une u Rangbah uba la iasaid aiñ mynta la 38-40 snem ha ka iingbishar ula ong ba u kwah ba kan don noh tang kawei ka nongrim jong ka thain Khasi bad Jaintia bad ba ka kam synshar kadei ban dei beit da ki trai ri trai muluk.
