Shillong, Jymmang 14: U Myntri Rangbah Conrad K. Sangma ha ka sngi Palei, u la pyllait paidbah ïa ki 95 tylli ki kali thymmai ka Tnad Pulit, kum ka sienjam kaba kongsan ban pynkhlaiñ ïa ka leit ka wan, ka beh kam beh jam, ka jingpynsuk ha ka kit ka rong iaki Pulit sha ki jaka kiba donkam Pulit bad ka jinglah ban ai jingshakri bha sha ki paidbah da ki Pulit ka Jylla.
Glad to flag off 95 vehicles for the @MeghalayaPolice worth ₹30 Crore, including mini trucks, buses, and jeeps, to strengthen mobility and operational efficiency at the grassroots level. These additions will enhance policing capabilities, improve response and outreach, and help… pic.twitter.com/Q7latYZEbQ
— Conrad K Sangma (@SangmaConrad) May 14, 2026
Ia kine ki kali la pyllait ha Police Officer’s Mess, Golflink, Shillong ha ka jingiadon ryngkat ka Director General of Police Kong I Nongrang, ki Heh Ophisar ka Sorkar, ki Heh Pulit bad ki Pulit ka tnad Meghalaya Police.
Na kine ki 95 tylli ki kali bala tied, haduh 79 tylli ki kali ki dei kiba la thied lyngba ka song pisa bala ai da ka Sorkar India hapoh ka Central Assistance to State Police Scheme.
Kine ki kali ki kynthup ia 20 tylli ki Maruti Jimmy, 19 tylli ki Tata truck ban kit ia ki Pulit, 5 tylli ki Mahindra Mini Truck, 19 tylli ki bus ba kit Pulit kaba don jaka shong haduh 20 ngut ki Pulit, 10 tylli ki bus ba kit Pulit kiba don jaka shongba 24 ngut, 8 tylli ki bus ba kit pulit kiba don jaka shong ba 36 ngut bad 8 tylli ki Tata Yodha na ka bynta ka CID. Da ka jingthied ia kumba 95 tylli ki kali ha ka dor ba kot kumba T.30 klur, ka Sorkar kala pynkhlain shikatdei eh ia ka jingtreikam, ka leit ka wan, bad ka jinglah ban leh kloi ia ki kam haba don kino kino ki jingjia ba donkam kyrkieh jong ki bor Pulit ha baroh kawei ka Jylla.
Ha kaba kren ha ka jingialang, u Myntri Rangbah Conrad K. Sangma u la ban jur ïa ka jingdonkam jong ka suk ka sain ha ka synshar khadar bad ban jur ia ka jingkut jingmut jong ka Sorkar ban pynkhlain ia ki bor Pulit lyngba ki jingkynshew pisa bad ki jingpynkylla kiba iai bteng.
“Ka jingpynneh ïa ka suk ka sain ka dang long kawei na ki kam kiba kongsan tam jong kano kano ka sorkar. Ka jingkut jingmut jong ngi ban pynkhlaiñ ïa ka jingpyntreikam ïa ka aiñ ka paw ym tang ha ki ktien jong ngi, hynrei khamtam eh, ha ki kam jong ngi,” u la ong.
Ha kaba kdew ïa ka jingbuh jingmut jong ka sorkar ha ka jingpynthymmai ïa ka Tnad Pulit kat kum ka juk mynta, u Myntri Rangbah u la ong ba ka jingpynkhlaiñ ïa ka tnat pulit ka dang long kawei na ki kam kiba hakhmat eh jong ka sorkar. U la kdew sha ki jingpynkylla kum ka Police Reserve Fund, kaba la sdang kum ki jingai jingmut na ki Ophisar kiba don ha ki distrik bad kaba la kylla long ki jingtuklar naduh tynrai kiba don jingmut.
“Lyngba kine ki jingpynkylla, ki jingtei kiba la jot mynshuwa mynta la maramot bad pynbha pat ia ki. Kaba kongsan tam, la aiti ïa ka bor bad ka jingkitkhlieh sha ki Superintendent of Police bad ki unit commander, ban pyntikna ïa ka jingpyntreikam kaba kloi bad kaba treikam bha,” u la ong.
U Myntri Rangbah u la kdew ruh ïa ka jingthungkam ïa palat 3,000 ngut ki Pulit ha ki jaka ba lait thylli la slem, da kaba khot ïa ka kum kawei pat ka jingpyni ïa ka jingkut jingmut jong ka sorkar ban pyntikna ba ki bor pulit ki don ïa ki briew bad ka jingkyrshan kaba donkam ban pyndep hok ïa ki kamram jong ki.
Ha kaba kren shaphang ki jingpyrshang jong ka sorkar ban pynkhlain ia ka jingdon ki kali ban pynsuk ha ka leit ka wan bad ka jingdon jong ki pulit ha kylleng ka jylla, u la ong, “Kane ka prokram mynta ka lah ban paw kum ka prokram kaba suk, hynrei ka long kaba don jingmut shibun. Da ka jingthied ïa kumba 95 tylli ki kali ha ka dor kaba kot kumba T.30 klur, ngi la pynkhlaiñ shikatdei ïa ka jinglah ban treikam jong ki bor pulit jong ngi.”
Ha kaba kren shaphang ki jingeh ba mad da ki pulit ha ka jingpynneh ïa ka jingsuk ha ki por huri hura, u Myntri Rangbah u la ïaroh ïa ki bor pulit na ka bynta ka jingstad ha ka rukom treikam, ka jingdon discipline, bad ka jinglah ban kiar bad iai shah. Ha kaba kdew ïa ka jingïakynad ba dang shen ha Lapangap, West Jaintia Hills, u la kdew ba ki pulit ki la don bynta kaba kongsan ban pyntikna ïa ka jingsuk bad ka jingjai jai ha ka thain katba ka sorkar ka dang ïai bteng ïa ka jingïakren bad ki kynhun na Assam ka kam ïapynbeit khappud.
Ha kaba ai khublei ïa ka jinglong nongïalam ki pulit, u Myntri Rangbah u la ong, “Nga kwah ban ai khublei ïa ka Director General of Police jong ngi Kong Idashisha Nongrang, bad ïa ka kynhun jong ka baroh kawei na ka bynta ka jingtrei shitom, ka jingïalam, bad ka jingkut jingmut ban pyntikna ba ïa ka shongsuk shongsain la pynneh hapoh ka Jylla.
Kane ka prokram kala kut da ka jingkhaweh lama ia kine ki kali ba thymmai da u Myntri Rangbah ha ka jingiadonlang ki kynrem ki lyndan.
