Shillong Jymmang 14: Haba pynbna ia ka jingkyrshan pisa ba T.23.37 klur na ka bynta ka jingpynkhreh jong ki nongialehkai hashuwa ka jingwan ka 39th National Games 2027, ka Sorkar Meghalaya ha ka sngi Balang kala pynlait ia ka jingkyrshan song pisa bad policy ba thymmai ha ka jingiakynduh bad ki nongialehkai, ki coach bad ki State Sports Association.
Ka pisa, kaban sa pyllait hapoh ka Team Preparation Programme, kan kynthup ia ka “ka jingpynbiang jaka sah ia ki nongïalehkai, ka bam bad ka jingïoh lad ban ïalehkai shabar,” ong u Myntri ka Sports and Youth Affairs Bah Wailadmiki Shylla.
“Ka National Games ka dei ka kabu kaba heh ia baroh bad ban ïoh ïa ka National Games kaba jop, ngi baroh ngi dei ban trei lang kum ka kynhun,” ong u Bah Wailad ha ka jingialang, haba kdew ïa ka jingkyrshan pisa kum shi bynta jong ka jingpyrshang kaba heh jong ka jylla ban buh ïa ki nongïalehkai ha khmat eh jong ka lynti iaid ka lympung.
“Kano kano ka rai ba ngi shim, kano kano ka policy ba ngi wanrah, ka long kaba donkam ban buh ïa ki samla ha ka jingmut,” u la bynrap, haba kynmaw ïa ka khubor jong u nongïalehkai kaba la pynpaw “ïa ka jingdonkam ïa ka jingkyrshan ha kaban pynioh ia ka bam ba tei met kaba kham bha bad ban ai ia ki lad ban pynbeit ïa ki jingeh.”
Ha kaba kdew ïa ka jingkiew ka jingpynlut jong ka jylla ha ki kam ïalehkai, u Myntri u la ong ba ka mang tyngka ba shisnem jong ka Tnat Sports ka la kiew na kumba T.40 klur ha kine ki hynñiew snem bala leit sha ka T.844 klur ha une u snem ba mynta.
U la ïaroh ruh ïa ka jingkiew jong ka Meghalaya na ka kyrdan 29 sha ka 13 ha ka Khelo India Tribal Games ba dang shen, da kaba ong ba ka jingmih “ka pyni ïa ka jingtrei shitom jong ki nongïalehkai, ki coach, ki sports association bad ka jingpynlut kaba ïai bteng jong ka sorkar ha ka roi ka par jong ki kam ïalehkai.”
Ban ai mynsiem ïa ka jingïalehkai bha, ka jylla ka la wanrah ïa ka Meghalaya Outstanding Sportspersons Direct Appointment Policy, kaba pyntikna ïa ka jingthungkam sorkar ïa ki nongjop takma ha ka National Games.
“Ha lyndet jong uwei pa uwei u nongïalehkai uba jop, don u Coach,” ong u Bah Wailad haba ai jingkular ïa ka jingkyrshan ïa ki coach.
U la bynrap ba ki nongïalehkai kiba pynkhreh ïa ka National Games kin ioh ia ka jingpynjynsur ha ka jingdon ha ki jaka pule, bad ia ka jingtyrwa yn sa rah iaren bad ka Tnad Pule Puthi na ka bynta ka jingpynlait kaba donkam.
Ha kaba kren sha ki nongthoh khubor, u Shylla u la ong, “Ngi la khot ïa baroh ki state association lem bad ki nongmihkhmat jong ki nongïalehkai namar ki long ki rishot kiba hakhmat eh na ka bynta ka jingjop ha ka jingpynlong ïa ka National Games.”
“Katba ka dei ka khyllip ban sah nam ha ka histori ka Meghalaya ban ioh pynlong ia ka National Games, ngi kwah ruh ban ïohi ïa ki nongïalehkai jong ngi ba kin leh bha. Namar kata ka long kaba donkam ban sngap na ki shaphang ki jingangnud, ki jingeh, bad ki jingdonkam jong ki. Ïa kane ka jingïalang la pynlong ban ai lad ïa ki ban ïakren,” u la ong.
“Nga sngewkmen ba bun na ki ki la kren ia ki mat bapher bapher, bad ka tnat kan sngewbha ban peit ïa ki,” u la bynrap.
Halor ki kam kiba kongsan ba la pynpaw da ki nongïalehkai, u Bah Wailad u la ong, “Ka kam kaba hakhmat eh ba la pynpaw ka long shaphang ka bam. Ki nongïalehkai ki donkam ban bam bun ban long kiba koit ba khiah, kumta ka bam ka long kaba donkam shikatdei eh.”
“Nalor kata, ki don jingsngewkhia shaphang kumno ka jinghikai ka ktah ïa ki jingpule jong ki, namar ki hap ban iehnoh ïa ki klas bunsien. Ki la kyrpad ïa ka jingsngewlem kyrpang na ki skul, bad ngi la ïakren ïa kata ruh,” u la ong.
“Nga la pyntip ïa ki ba hapoh ka Phase-II, ngi la kynthup ïa ka jingkyrshan bam. Ngin ai pisa sha ki state association ban pyntikna ïa ka bam kaba tei ïa ki nongïalehkai. Ngi la mang ruh ïa ka pisa na ka bynta ka jaka sah, namar bun ki nongïalehkai ki sah ha kylleng ka jylla bad ki mad ïa ki jingeh ha ka leit ka wan,” la batai u Shylla.
