Shillong, Naiwieng 20: U Myntri Rangbah ka jylla u Conrad K Sangma u la ong ba ka sorkar ka ieng bad ki nonghikai deficit kiba iakhih hapoh ka lama KJDSTA, hynrei kano kano ka rai halor ki jingdawa jong ki kam dei ban don ka jingktah ha ka liang ka pisa tyngka bad ka jingktah ia kiwei pat ki nongtrei.
“Ngi iatreilang bad ngi kwah ban pynbeit, ngi kwah ban wad ia ka lad ban iaid shakhmat”, la ong u Conrad.
“Ngi burom ïa ki jingsngewkhia jong ki nonghikai, nga don ryngkat bad ki nonghikai, nga sngewthuh ïa ki jingeh jong ki,” u la bynrap.
U Conrad ula ong ba ka sorkar MDA ka thaw rekod ba kadei ka Sorkar ba iakynduh bun tam bad ki nonghikai bad ban shim ia ki rai kiba eh.
“Kane ka sorkar ka la long kawei na ki khyndiat tylli ki sorkar kiba la ïatreilang bad baroh ki nonghikai ba bun jait, u la ong. “Ki nonghikai adhoc ngi la wanrah ïa ki hapoh ka SPF, kaba dei biang ka rai kaba eh bha hynrei la lah ban pynbeit ïa kiei kiei baroh”.
U Conrad u la pynshai ba ki skul deficit ki dei ki skul shimet ba la pyniaid da ki mission, ki Balang ne ki shnong ki thaw, ha kaba ia ki nonghikai la thung da ka Managing Committee hynrei la siew tulop da ka sorkar.
“Ki dei ki nonghikai skul shimet hynrei ia ka tulop jong ki la siew da ka sorkar jylla. Kumta kim dei shisha ki nonghikai sorkar ba pura” u la ong.
U la ong ba katei ka rukom treikam kaba la sdang naduh ka por jong ka Sorkar phareng, ka la pynmih ia ka jingbym iaryngkat haka rukom siew tulop iaki nonghikai.
Ha ki kolej deficit, don ki nonghikai kiba kamai T.4.5 lak shibnai kham bun ban ia u Lat katba ha kajuh ka jaka pule, ki nonghikai bym dei deficit kiba hikai ia kajuh ka sobjek ki kamai tang T.5,000 haduh T.20,000 tyngka, u la ong.
“Ki don kumba 10 ngut na ki kiba ioh tulop palat ia ka T.4 lak, kata ka long kumba T.50 lak shisnem”, u la ong.
“Kane ka la jia namar ka rukom treikam kaba la thaw. Kam dei ka jingbakla jongno jongno ruh”, u la ong.
U Conrad u la ong ba ka sorkar kam lah ban thaw nonghikai deficit thymmai man ka por haba ka hap ruh ban kyrshan ia ki skul LP bad kiwei kiwei ki jaka pule.
“Ngim lah ban thaw man ka por ïa ki post deficit namar ngi dang don ki jingeh, ngi hap ban ïarap ïa la ki jong ki skul sorkar” u la ong.
U la maham ba ka rai na ka bynta kawei ka kynhun ka pynmih ia ki jingdawa sa na kiwei pat.
“Shisien ba ngi la sdang ban shim ïa ki rai kiba ïadei bad kawei ka kyrdan, ka don ka jingktah kaba jur bha ïa kiwei pat ki kyrdan,” u la ong. “Ka don ka jingktah kaba jur bha ïa kiwei pat ki nongtrei bad kiwei kiwei ki kynhun nongtrei ne ki Kynhun kiba ka sorkar ka kyrshan, kum ki PSU.”
“Man la ka rai ba ngi shim ka don ka jingktah bad ka plie lad ïa shibun ki bynta jong ki jingeh na ka bynta jong ngi bad ka don ka jingktah kaba khraw ha ka liang ka pisa tyngka,” u la ong.
U Myntri Rangbah u la ong ba ka sorkar ka dang ia kren bad ki nonghikai ban wad ia ki lad kumno ban lah ban pynbeit noh iaki jingsngewkhia jong ki.
“Ngi dang pyrshang ban wad ia ki lad kaei kaba bha tam ban lah ban pynbeit iaki jingeh jong ki nonghikai’ u la ong. “Kam long kaba suk kumba ka paw. Ki don bun ki daw bad ki nongshim bynta kiba don bynta ha kane bad ngi, ngi pyrshang ban pynïahap ïa baroh.”

