Shillong, Jymmang 13 : Ka Champion jong ka samoi Ialehkai ba la dep-ka Mawlai Sports Club, ka la pyniakhaid ha ka minit ba khatduh da 1-1 kol pyrshah ia ka Nongkseh SSCC ha ka jingiakhun kaba nyngkong jong ka Super 8 ka lympung 5th Meghalaya State League ba long hynne ka sngi, ha SSA Stadium, Polo.
Ka Shillong Lajong FC kala lah ban pynliem ia ka Rangdajied FC da shikol ha ka jingiakhun kaba ar jong ka Super 8.
Haba phai sha kajingiakhun hapdeng ka Mawlai SC pyrshah iaka Nongkseh SC, ki bynta ba shong peitkai ki paidbah ki la dap lut ki shuki da ka jingwan ban ia ai mynsiem bad kyrshan na ki paidbah jong baroh artylli ki shnong, kaba la pynshong shit bha ia kane ka jingiakhun, kampher wat hadien ba ka MFA ka hap ba kan pynlong ia ka ha ka por 2 baje nohphai sngi.
Haba phai sha ka jingiakhun, ka Nongkseh SSCC ka la lah ba kan tam shakhmat da ka jingioh ban thep ia ka kol ba nyngkong lyngba u samla Hardy Clif Nongbri uba la ioh ban pynkhih jar ha ka minit kaba 39.
Ka Mawlai SC hapoh ka jingialam u Coach bah Hering Shangpliang kala iakhun tyngeh bad ha ka minit ba la pynjlan ia ka por ialehkai, u samla Verjelous Shylla ula ioh ban pynkhih ia ka jar ha ka minit ba 90’+3.
Katba ha ka jingiakhun kaba ar, ka shi kol kaba la thep lyngba u Banlamkupar Rynjah (73′), ka la biang pura ia ka Shillong Lajong FC ba kan pynliem ia ka Rangdajied United FC.
Lashai pat ka sngi ka jingiakhun kan dei naka Group B, kaba long hapdeng ka Nangkiew Irat FC pyrshah ia ka Rymbai Shkenshynriah SC ha ka por 11 baje mynstep bad ka Langsning FC pyrshah ia ka Maram FC kaban long ha ka por 3 baje nohphai sngi, ha madan Third Ground, MFA Turf, Polo.
