Kurup ka ED ia ki jingdon jingem ba T.1.06 klur ha Meghalaya ha ka jingtohkit ia ka kam shukor pisa

Shillong, Jymmang 10 : Ka Directorate of Enforcement (ED), Shillong Sub-Zonal Office, kala kurup ia ki jingdon jingem kiba lah ban die, ba shongdor T.1.06 klur haba iadei bad ka jingkynnoh kam shukor pisa ka “Global Media App” kaba dei ka Online Investment kompani ba don ha Meghalaya.

Ia kane ka jingkurup la leh hapoh ka kyndon ka Prevention of Money Laundering Act (PMLA), 2002 kum shibun jong ka jingtohkit ba dang iaid halor ka skhim shukor ba kynnoh thok ia ki nongkynshew lyngba ka jingkamai online bad ka rynsan kynshew pisa.

Kat kum ka jingong ka ED, Ia ka jingtohkit la pynlong halor ka ejahar bala mudui ha Madarting Police Station ha East Khasi Hills District, hadien ka jingujor ba shah thok shah shukor pisa ha ka “Global Media App”.

Ki kynhun tohkit ki kynnoh ba u briew ba donkti ban pyniaid ia kane ka App hapoh ka nam jong ka Online Advertising platform, ula kular ban ioh jingsiew man ka sngi da kaba peit ia ki video advertisement. La pynngop ia ki lanot ba kin kynshew kham bun ka pisa ha ka VIP membership plan da ka jingkular ba kin ioh ia ka jingsiew ba kham heh bad ruhka Commission lada ki pynioh briew ba kynshew.

Ka ED ka ong ba une u nongshukor ula pyniaid iew ia ka app tang lyngba ki telegram bala pyndonkam da ki nombor mobile phone ba nabar ka ri bad la lum a ka pisa lyngba ki bank transfer, UPI transaction bad cryptocurrency wallet. Kane ka app kala sdang treikam naduh ka 3 tarik Jylliew 2022 bad haduh ka 12 tarik Risaw, 2022 hashuwa ka jingkhang khyrdep bad jingphet krad u trai ryngkat bad ka pisa.

Ka EDka ong ba ka jingtohkit haduh mynta kala lapdien ia ka kam bymman kaba kot jan T.45.33 klur bala pynmih lyngba kane ka skhim. Ka ED kala lapdien ruh ia bun ki bank account, ki merchant ID, payment gateway account bad crypto wallet bala pyndonkam ban thep bad pynkynriah ia ka pisa.