Shillong, Jymmang 10: U Symbud Myntri Rangbah ka tnat kam pohiing (Police) bah Prestone Tynsong ha ka 9 tarik u Jymmang u la plie paidbah ia ka Ophis treikam ba shirta jong ka Barato Police Outpost ha West Jaintia Hills district, bad pynpaw ba kane Ophis kan pynkhlain ia ka tnat pulit ban khmih bad tehlakam ia ka suk ka sain ha ki thain khappud ka Meghalaya-Assam.
Ha kane ka sngi la don lang u Symbud Myntri Rangbah k kam Pynroi Sor bah Sniawbhalang Dhar, u MLA ka Mowkaiaw Bah Nujorki Sungoh bad ka Director General of Police Meghalaya Kong Idashisha Nongrang, ha ryngkat ki heh ophisar ka district bad ki ophisar ka tnat pulit.
La tei iaka Ophis ka Barato Police Outpost ha ka jaka kaba heh 4.6 akar kaba dei ka jaka bala ai sngewbha da ka shnong Barato bad u bah Profitable Dkhar (Bam Kwai Dwar u Blei) ha u snem 2017.
Haba kren ha ka jingïalang, u bah Prestone u la ong ba kane ka Ophis treikam kan pynlah ïa ki pulit ban ai ia ka jingshakri ba kham bha haba jia ki jingjia aksiden bad ban pynneh pynsah ïa ka suk ka saiñ ha kane ka thaiñ.
U la kyntu ia ki nongshong shnong ban iatreilang bad ki bor jong ka ain bad ban iatreilang ban iada na ki kam sniew ha ki shnong ki thaw jong ki.
Ka DGP ka Kong Idashisha Nongrang ka la ong ba ka jingthaw ia ka Barato Outpost ka pyni ia ka jingdonkam pulit kaba nang kiew ha katei ka thain, khamtam ha ki shnong kiba don hajan khappud bad ka Jylla Assam.
Ka la ong ba ia katei ka Ourpost, kaba la mynjur ha u bnai Naiwieng 2022, la pyndep lyngba ka jingiatreilang kaba jan hapdeng ka bor distrik bad ki pulit ka distrik.
Ka la bynrap ba kane ka outpost kan don ka bynta kaba kongsan ban pynneh ia ka jingsuk bad ban weng ia ki jingeh kiba iadei bad ki kam runar ha ka thain khappud.
U Additional Superintendent of Police Bah W Lyngdoh uba la pynïaid ïa kane ka prokram, u la shim iakane ka jingplie Ophis kum ka “lynnong kaba thymmai” na ka bynta kane ka thaiñ bad ong ba kane ka outpost kan long kum ka dak jong ka jingshaniah bad ka jingïada ïa ka Barato bad ki shnong ba marjan kiba hap hapoh ka jingpeit jong ka.
Ha kane ka sngi, u bah Prestone u la buh ruh ïa ki mawnongrim na ka bynta ki projek pynheh surok ba kot haduh T.24.79 klur ha West Jaiñtia Hills.
Ki projek ki kynthup ïa ka jingpynbha bad pynheh ïa ka surok Nartiang–Jonglwit-Barato na ka 14 km sha ka 21 km ha ka jinglut kaba T.16.93 klur, ka jingsiang rong ïa ka surok hapoh ka shnong Shilliang Myntang haka jinglut kaba kaba T.3.07 klur, ka jingpynbha ïa ka surok hapoh ka shnong Mallageit haka jinglut T.3.07 klur, ka jingpyntrei ban pynbha iaka surok naduh 13th NJB haduh Thadbamon ia kaba la mang T.1.78 klur.
 bah Prestone Tynsong ha ka 9 tarik u Jymmang u la plie paidbah ia ka Ophis treikam ba shirta jong ka Barato Police Outpost ha West Jaintia Hills district, bad pynpaw ba kane Ophis kan pynkhlain ia ka tnat pulit ban khmih bad tehlakam ia ka suk ka sain ha ki thain khappud ka Meghalaya-Assam.){kind=link}