Imphal, Nailur 11: Ki hynriew tylli ki seng kaikhlaw ka jylla Manipur kila rai ban boycott ia ka jingwan iuh kjat u Myntri Rangbah duh ka ri u Narendra Modi ha ka 13 tarik mynta u bnai, wat haba ki seng Kuki ki la pdiang sngewbha ïa ka kum ka “jingjia kaba phylla bad kaba don histori.”
Ka Coordination Committee (CorCom), ka kynhun ki hynriew tylli ki seng kaikhlaw kiba kynthup ia ka Kangleipak Communist Party (KCP), KYKL, PREPAK, ka UNLF bad ka RPF-PLA, kila pynbna paidbah ban pynlong ia ka jingkhang dam naduh ka por 1 baje mynstep tad haduh ban da leit phai u Modi.
Ka CorCom ka la kynnoh ba ka Sorkar Pdeng ka la aiding ia ka jingiakynad ba dang ïaid shakhmat hapdeng ki Meitei bad ki Kuki naduh u bnai Jymmang 2023 bad ka la pyrshang ban “pynkylla ïa ka Manipur sha ka thaiñ kaba synshar da ki nongshong shnong ka ri India.”
Na ka liang ka Kuki-Zo Council (KZC) ka la pynpaw ïa ka “jingpdiang sngewbha” ïa u Modi, da kaba pynpaw biang ïa ka jingdawa jong ka ban don ka jingsynshar kaba kyrpang.
Haba niew ïa kane kkum a jingwah iuhkjat kaba nyngkong eh dau Myntri Rangbahduh ha kine ki saw phew snem, ka Council ka la batai ïa ka kum ka “histori” bad ka la pynksan ïa ka jingjynjar jong ka imlang sahlang naduh ba la jia ka jngia umsnam hapdeng ki ar jaitbynriew ha u snem ba la dep, kaba la shim ïa palat 250 ngut ki mynsiem briew.
La khmih lynti ba u Myntri Rangbahduh ka ri un sdang ïa ka jingleit jngoh jong u ha Churachandpur shwa ban ai jingkren ha ka jingïalang ha Imphal, Kangla Fort. U lah ruh ban ïakynduh ïa ki lanot kiba la shah pynkynriah jaka na ka daw ka jingïakynad, watla ym ha ki jaka ai jingïarap namar ka jingduna ki bor pahara ha ka liang ka jingïada.
