Imphal, Jylliew 1: San ngut ki kai khlaw kila shah kem, hadien ba ki bor pahara kila pynkhlain ia ka jingkhynra pyrshah ia ki kynhun kai khlaw kiba don hapoh ka jylla Manipur.
Haba buddien katkum ka jingtip na ki tnad syntiat, ki Pulit ka jylla Manipur ha ryngat bad kiwei de ki bor pahara ki dang pynjur shuh shuh ia ka jingkhynra bad pynduh jait ia ki kam sniew bal eh da ki kynhun kai khlaw kum ka jingkhaii drug bad kiwei kiwei de ki kam kiba ktah ia ka shongsuk shongsain.
Ki briew kiba la shah kem, la ithuh kum u Kharibam Nimai Singh (45) snem bad ka Thingnam Sangeeta Devi (42) snem ka rta, la kynnoh ba ki donkti ha ki kam dawa pisa na ki riew paidbah, ki skul shimet bad na ki par maw kiba don ha katei ka thain.
Ha kawei pat ka jingkhynra, kawei ka Mahindra Thar ki pulit kila ioh ban bat na khmat ka ophis jong ka Imphal Telegraph Office kaba hap hapoh Imphal Police Station, Imphal West District.
Ha ka jingtalasi, ki pulit kila lap ia 100 tylli ki synduk sabon kiba khia kumba
1.16 kg bad la suba u dei u drug heroin powder na ka sat jong ka kali kiba la buhrieh bha. Halor kane lai ngut ki briew kila shah kem ba kynthup ia u Wangpem Lamkang (20) snem, u Jacop Shangkhil (18) snem bad u Wanghon Khular (18) snem ka rta bad kine baroh kidei na Chandel District.
Na ka liang ki bor pahara ki dang pynkhlain ia ka jingkhynra ruh ban dang wad bniah ha ki jaka ba long lum bad kumjuh ruh ha ki jaka madan jong kane ka thain bad ha ka shnong Thanlon kaba hap hapoh ka Pherzawl District, la ioh ban kurup ia ar tylli ki suloi SBML kiba khlem don ia u serial numbers.
Ha kawei pat ka jingkhynra ha Wabagai Thingel Leikai kaba hap hapoh Hiyanglam Police Station jong ka Kakching District, kala pynlong ia ki bor pahara ba kin ioh kurup ia shibun ki tiat siat bad ki kuli ba kynthup ia ar tylli ki
INSAS rifles, saw tylli ki .303 sniper rifles, ar tylli ki SLRs, kawei ka anti-riot gun, bad bun bah ki kuli bad la ioh ruh ban kurup ia lai tylli ki tubes taiar kali.
