Shillong, Jylliew 01: Hapdeng ki jingjia ha ka sain pyrthei bad hadien ka jingmih noh u MLA barim u Bah Jemino Mawthoh na ka United Democratic Party (UDP), ka Meghalaya BJP haka 31 tarik Jymmang ka la pynpaw ba kan pdiang sngewbha ia u Bah Jemino lada u rai ban rung sha ka BJP.
U Nongaiktien ka Meghalaya BJP, u Bah Mariahom Kharkrang u la pynpaw ba watla kam pat don kano kano ka jingïakren kaba thikna haduh mynta, hynrei ka party kan pdiang ïa ka jingwan rung jong u Bah Jemino.
“Kam shym la don kano kano ka jingiakren, hynrei hooid ka BJP ka pdiang sngewbha ia kino kino kiba kwah ban wan iasoh bad ka party jong ngi, lada u Dr Jemino Mawthoh un iasoh kan long ka jingkyrkhu iaka Party namar ka jingtbit bad ka jingshemphang jong u bad kaei kaei kaba u don kan kyntiew ia ka party jong ngi. Ka jingkhang jong ngi ka plie beit”, la ong u Bah Mariahom Kharkrang.
U Bah Jemino Mawthoh, uba dei u MLA barim bad u nongialam ba rangbah ha ka UDP, u la mih noh na ka Party hadien ba u la iasoh la palat shiphew snem.
U Bah Jemino u la iehnoh ruh ia ka kam kum u Honorary Adviser jong ka Sorkar Jylla.
Watla ka BJP kam pat shim ia kano kano ka sienjam ban pynrung ia u Bah Jemino hynrei ka jingkwah jong ka BJP ban pdiang sngewbha ia u Bah Jemino kan wanrah shuh shuh ki jingiakren.
La tip ïa u Bah Jemino Mawthoh na ka bynta ka rukom ïalam kaba don nongrim bad ka jingshai ha ka rukom synshar, u la bat ïa ki kam ba kongsan ha ka UDP, kynthup kum u
working president bad general secretary.
U Bah Jemino Mawthoh u la ïakhun ruh ïa ka elekshon Lok Sabha 2019 na Shillong constituency.
, ka Meghalaya BJP haka 31 tarik Jymmang ka la pynpaw ba kan pdiang sngewbha ia u Bah Jemino lada u rai ban rung sha ka BJP.){kind=link}