Kular ka Sorkar ban thungkam noh shen ia ki Pharmacist ha ki kam ba lait

Shillong, Iaiong 29: Ka Meghalaya Pharmacists Association (MPA) ka la pyntip ba ka tnat ka koit ka khiah ka la pynthikna ban sa thung pyndap noh ia ki kam Pharmacist ba lait ha ki bnai ban wan.

Haba ïakren shaki lad pathai khubor, u President ka MPA samla Englebert Rynjah u la ong ba ka Association ka la ïakynduh ïa ka Myntri ka koit ka khiah Kong Ampareen Lyngdoh bad kyntu ban shim iaki sienjam ki ban weng ïa ki jingeh jong ki Pharmacist hapoh ka Jylla.

Halor ka jingduna ki lad ioh kam, u Bah Englebert u la ong ba katkum ka RTI haduh kine ki sngi kam pat don kano kano ka jingthungkam Pharmacist lyngba ka jingpynbna paidbah lane Advertisement kaba la shim da ka Sorkar na ka bynta ki Sanctioned Posts kum ki pharmacist hapoh ka Directorate of Health Services.

“Namar kata ngi la kyrpad ïa ka tnat ban sdang ïa ka jingpynrung kam kaba hok bad kaba kynthup lang ia baroh ki Sponsored bad Non-Sponsored Pharmacist ki ban ïakhun na ka bynta ki kam ba lait. Haka jingialang ka Myntri kala kular baka tnat ka koit ka khiah kan sa pynbna paidbah lyngba ka Advertisement haba iadei bad ka jinglait kam Pharmacist” u la ong.

Ha kaba iadei bad ka jingkyrpad ban pynbun Pharmacist Katkum ki kyndon jong ka IPH ha baroh ki jaka sumar, kum ka District Hospital, CHCS, PHC, bad Sub-Centre, u samla Englebert u la ong ba baka tnat ka koit ka khiah kan wanrah ka jingpynkylla iaka Service Rules katkum ka jingdonkam ban weng iaki jingeh.

Ha kaba iadei bad ka jingdawa ban thung bun ngut ki Drug Inspector (DI) ha ka Jylla, u president ka MPA u la ong ba ka tnat ka la pynthikna ruh ban pynmih ia ki jingpynbna na ka bynta ban pyndap ia ki kam kiba lait.

Nalor kane ka MPA ka dawa ruh na ka Sorkar ba ka dei ban pynbun ia ki lad ioh kam ioh jam ia ki samla kiba la pyndep ia ka jingpule pharmacy da kaba thaw daka Pharmaceutical Industries hapoh ka Jylla ha kaba ka tnat ka koit ka khiah kala kular ban eksamin ia kane.

Ka MPA ka dawa ruh ban don daka jingjied lane ilekshon kaba khuid bad ba suba jong ka Meghalaya Pharmacy Council khnang ban jied ia ki riew shemphang kiba tbit ban mihkhmat ia ka imlang sahlang.

“Da kaba pynshong nongrim ha ka jingtip jong ngi, ka ilekshon kaba khatduh na ka bynta ka Meghalaya Pharmacy Council ka la long ha u snem 1996, bad ym shym la don kano kano ka ilekshon naduh kata ka por. Ngi kyrpad ban pynim biang mardor ïa ka Council bad ban sdang noh da ki ilekshon ba thymmai katkum ka aiñ Pharmacy Act, 1948, khnang ba ïa ki mat kiba kongsan yn lah ban pynbeit da ka Sorkar Jylla” u la ong.