Shillong, Iaiong 29 : Kum ka sienjam ban sah jingkynmaw iaka jingpynrung ia ka ktien ka thylliej bad ka jingnang kiew ka teknoloji, ka Sorkar Meghalaya ka la iasoi ia ka soskular (MoU) bad ka tnad Digital India Bhashini Division, Ministry of Electronics and Information Technology (MeitY), ka Sorkar India, na ka bynta ban pynrung ia ka ktien Khasi bad Garo ha ka rynsan BHASHINI.
Kane ka jingiasoi soskular kala urlong ha ka jingiadon ryngkat u Myntri Rangbah ka Jylla Conrad K Sangma bad u Myntri ka Tnad Arts & Culture Bah Paul Lyngdoh. Kiwei kiba la iadonlang ki kynthup ia ki dkhot ka Khasi Literature Society bad ka A’chik Literature Society.
Ka BHASHINI, ka dei ka flagship program hapoh ka Digital India Programme, ban pynrung ia ki ktien ki thylliej ha ki kor teknoloji khnang ba ka pyrthei kan tip bad ba kin lah ban sngewthuh ne nang ban kren.
Haduh 22 tylli ki ktien ki thylliej ka Ri India kila rung hapoh kane ka prokram bad da ka jingpynrung lang sa ia ka ktien Khasi bad Garo, kan pynlong ia ka Meghalaya kum kawei na ki Jylla ba lah ban pynlong ia ka ktien ka thylliej ki trai muluk kaba lah ban shem ha ka kor Digital hapoh ka Ri.
Haba kren ha ka jingialang, u Myntri Rangbah Conrad K Sangma ula pynpaw ia ka jingsngew sarong haba ong “Mano ban poi pyrkhat ba shisien ka sngi, lyngba ka bor jong ka Artificial Intelligence, ban gin lah ym tang ban pynkylla ktien ia kaei kaba ngi ong ne mut da ka kor digital?. Ka teknoliji mynta kala poi ha kawei pat ka kyrdan kaba ym ju don ba poi pyrkhat satia. Kane ka sienjam kan don ka jingktah kaba khraw ha baroh ki liang jong ka imlang sahlang bad ka synshar ka khadar, naduh ka iakren iakhana ha ki shnong ki thaw sha ka jingpyn khlain ia ki kam jngohkai, ka jingsengkam, ka pule dangle bad ha ka liang koit ka khiah”.
Haba kren ïa ki jingktah kiba kham iar, u Conrad ula bynrap, “Kane ka jingthmu kan pynkylla dur ïa ka rukom ïakren bad ïatreilang jong ki tnad sorkar bad ki nongshong shnong. Kan plie ia ki lad thymmai ïa ki nongseng kam seng jam bad kan ïarap ban pynlong ïa ka synshar khadar kaba kdup lang ia baroh bad kaba treikam bha. Nga pynshlur ïa baroh ban pyndonkam ïa ka teknoloji ban pynïaid shakhmat ïa ka jingthaw kam thaw jam, ka jingwanrah ia ki buit treikam ba thymmai, bad ka jingsengkam sengjam.”
Kum shi bynta ban pyntreikam nyngkong, la thaw ia ka State Language Mission na ka bynta ka Bhashini hapoh ka jingialam jong u Chief Secretary Bah D.P Wahlang. Ka Mishon kan pynthikna ia ka jingpyniasoh kaba khlem jingeh, ka jingwad bniah, bad ka jingpynroi ia ki ktien Garo bad Khasi lyngba ki kor digital, kynthup ia ka jingpynrung ia ki dak thoh ba kyrpang bad ki jingpher ba iadei bad ka ktien.
U CEO ka Digital India Bhashini Division, Amitabh Nag bad Commissioner Secretary, IT Department Pravin Bakshi kila iasoi ia kane ka MoU ban pyntreikam ia ka prokram hapoh ka Jylla.
 bad ka tnad Digital India Bhashini Division, Ministry of Electronics and Information Technology (MeitY), ka Sorkar India, na ka bynta ban pynrung ia ka ktien Khasi bad Garo ha ka rynsan BHASHINI.){kind=link}