Shillong, Naiwieng 03 : Haba shimkhia ia ka jingai jingmut jong ka Iingkashari Meghalaya High Court, ka Sorkar Jylla ha ka Sngi Ba-ar ka la shong jingïalang bad ka Bar Association ban wad ïa ka lad ban pynbeit halor ki kyndon treikam ha kaba ïadei bad ka jingthung bad ka jingpynrung kyrteng (empanelment) ïa ki muktiar jong ka Sorkar.
Ia ka jingialang la pyniaid da u Myntri ba khmih ia ka Tnad Ain Bah Lahkmen Rymbui bad la wan ia shimbynta da ki dkhot ka Bar Association, u Advocate General, Commissioner & Secretary ka Tnad Ain lem bad u Joint Secretary ka tnad Ain.
Ka PIL kaba don ha ka jingbishar ka High Court ka tynjuh pyrshah ia ki kyndon bala pynmih da ka Sorkar ban pynrung kyrteng ia ki muktiar Sorkar ha ki iingkashari bapher bapher ha ka Jylla bad ha ka ri.
U bah Rymbui ula iathuh ba ka High Court kala ai jingmut ba baroh ki kynhun ba don bynta ha ka kam, kin iashonglang bad pynbeit ia kane ka kam.
“Ka don ka jingai jingmut da ka High Court ba balei ba ka Bar Association, u AG bad ka Sorkar hapoh ka jingialam u Myntri ka tnad Ain, kin iashong lang bad wad ia ka lynti ban pynbeit” ula ong.
U iathuh ba baroh arliang mamla kila pynpaw iala ki jong ki jingsngew ha ka jingialang.
“Mynta a sngi ngi la iashong bad ngi la iasngap ia kaei kaba ki don ban pynsngew, ngi la pynsngew ia ka nongrim jong ngi bad ngi la sngap ruh ia ki mat ba ka Bar Association kala pynpaw” ong u bah Rymbui.
Kat kum ka jingong jong u, ka Bar Association kan sa aiti da ka jingthoh kaba batai bniah ia ki bynta jong ka kyndon treikam ba mynta, kaba donkam ban hap pynbha.
“Kumta, ngi la iapoi sha ka jingiasngewthuh jingmut bad ka Bar Associaton bad ka Sorkar ba kin sa ai ha ngi ia ki jingthoh ba bniah halor kaei kaba donkam ban pynbha ia ki kyndon bala shna da ka Sorkar ban thung lane pynrung kyrteng ia ki muktiar Sorkar ha ki iingkashari bapher bapher jong ka Jylla” ula ong.
U iathuh ba kan sa don biang ka jingialang hadien bala ioh pdiang ia ki jingai jingmut.
