Shillong, Naiwieng 03: Ka Mawlai SC ka la tehlakam naduh ba sdang haduh kaba kut ban ioh ia ka jingjop da 3-0 pyrshah ia ka Lamlynti FC, ha ka jingialehkai ba sdang jong ka SSA Champions Cup 2026, ba long hynne ka nohphai sngi ha SSA Stadium, Polo.
Ha shwa ban sdang jong kane ka jingiakhun ka la don ka jinghiar ban kitbok ia ki artylli ki tam ba la ialam da u Working President ka SSA bah Robert Dkhar bad ki dkhot ki jong ka Association.
Ia kine ki lai tylli ki kol ka Mawlai SC, la thep ia ki da u Damanbhalang Chyne (21’), Ricky Chyne (27’) bad Arkibor Makhroh (48’) .
Ym lah ban len ba ka jingiakhun hi ka long u lum bah u lum san ia ka kynhun ialehkai ka Lamlynti FC kaba wan ba-ar na ka lympung ialehkai jong ka Third Division mynta ka samoi, katno tam lei lei ba mar sein ia sdang hap ban aireng pyrshah syndon ia ka Mawlai SC, ka kynhun kaba rah ia ka nam kum ka lahduh ka SPL, kampher wat hadien ka jingpyrshang ka jong ka ban shim kylliang shipor (on-loan) ia san ngut ki player.
Pynban, kane kam shim la lah than ba kan pynkhlain ia ka kynhun kaba ka kol kaba nyngkong u Damanbhalang ka long kaba itynnad tad haduh ba u Nister Roy Suting um lah ban leh eiei shuh ban khanglad ba kan rung sha ka kol. Ka kol kaba ar lyngba u Ricky, kaba hangne ruh u Nister um shim la lah ban khanglad ba kan rung sha ka kol, kaba kren shai kdar ia katta ka jingmut ba ka kynhun ialehkai ka Mawlai SC kaba sei madan ia ka rukom ialehkai kaba khlain.
Kaba pynrandien shuh shuh ia ka Lamlynti FC ka dei ka jingshah thep kham kloi ka kol kaba lai , kaba la jia marsien ia sdang jong ka kylla miet lyngba u Arkibor, kaba hangne ka la long shisha u lymban uba la ban hi bhek ha ka bor ialehkai ka jong ki.
Lashai ka sngi kan dei biang ka jingiakhun jong ka Group A ha kaba ka Nongkrem SC kaba wan ba-ar (runners-up) ka First Division kan mih madan ban iakhun pyrshah ia ka lahduh ka Second Division ka Mawpat SC, kaban long ha ka por 2:30 nohphai sngi.
