Imphal, Nailar 31: 9 ngut ki MLA jong ka jaidbynriew Naga, hapoh ka jingialam u Symbud Myntri Rangbah Losii Dikho, ki la kyntu ia u Myntri ka tnat kam pohiing ka Sorkar Pdeng Amit Shah, ban pynmih iaka hukum ban kem ia ki nongialam seng kaikhlaw Kuki-Zo, kiba la kynnoh donkti ban pyniap ia ki riew paidbah, bad ban shim daki sienjam ba tyngeh pyrshah iaki ba donkti haki kam thombor.
Ha ka dorkhas ki MLA kila dawa ban kem mardor ïa u Thangboi Kipgen jong ka Kuki National Front-Progressive (KNF-P), u kurim jong ka Nemcha Kipgen.
Ki la kynnoh ba ki kaikhlaw ba la ialam da u Thangboi Kipgen ki donkti ban pyniap ia ki 6 ngut ki riew paidbah ka jaidbynriew Naga.
Ka dorkhas bala phah sha u Amit Shah ka kdew ïa ka jingjur ka jingbym ia sngewthuh jingmut kaba jur ha Manipur, ha kaba uwei u Symbud Myntri Rangbah u la ïasoh bad kiwei pat ki MLA naka jaidbynriew Naga ban dawa pynshitom ia uwei pat u Symbud Myntri Rangbah.
Kiba la soi kyrteng ha katei ka dorkhas ki kynthup u Symbud Myntri Rangbah Losii Dikho, ki MLA kata Awangbow Newmai, J Kumo Sha, Khasim Vashum, Leishiyo Keishing, Janhemlung Panmei, Ram Muivah bad S.S Olish; bad u chairman ka Hill Areas Committee u Dinganglung Gangmei.
Ki MLA kila dawa ban pynduh noh mardor ia ka jingiateh ban pynsangeh ia ki kam khynra bad baroh ki kynhun lehnoh Kuki, da kaba kynnoh ba ki ju pynkhein bad thombor ia ki riew paidbah.
Haba ia dei bad ka jingshah pyniap jong ki 4 ngut ki riew paidbah Naga ha shilynter ka surok IT Road ha ka 27 tarik Nailar, MLA ki la ong ba kane ka jingjia ka la jia wat hapdeng ka jingbym pat wan shimti iaki met iap kum ka jingpyrshah ia ka jingbym lah ban kem ia kiba donkti.
Ki la kdew ruh ia ka jingkynnoh ba ka don ka jingshah hiar thma ha TM Kasom ha ka National Highway-202 ha ka 18 tarik Iaiong ha kaba arngut ki briew ki la iap, bad ka jinghiar thma ia ka shnong Langka ha ka 14 Nailar ha kaba la kynnoh ba 2 ngut ki nongrep ki la iap bad ka shnong ka la shah thang.
Da kaba maham ia ki jingma kiba lah ban mih na ka sain pyrthei, ki MLA ki la ong ba kin ym lah ban iada ia ka jingkyrshan ba bteng jong ki ia ka Sorkar Manipur ha khmat ki paidbah lada ym shim iaki sienjam ba tyngeh pyrshah iaki briew ba donkti thombor.
“Ka jingbteng ban kyrshan ia ka Sorkar Manipur” kan long kaba eh ban pynshisha, ki la ong, da kaba bynrap ba kano kano ka sienjam baka Sorkar kadei ban shim kadei ban long naka bynta ka jingmyntoi jong ki paidbah ka Manipur” ki la pynpaw.
