Nongstoin, Nailar 31 : Ki runar ki bym lah ban tip ki dei kiei, kila khang dusmon ia ka dukan kaba don hajan ka Kshaid Weinia, kaba dei kawei na ki jaka jngohkai ha ka thain Nongkhnum ha ka miet shiteng synnia jong ka 30 tarik Nailar.
Katei ka dukan ka dei jong u bah Spailin Lyngkhoi bad ka kong Balinda Iawren, ong ki Pulit.
Kine ki trai ki ju sah man ka sngi ha katei ka dukan hynrei ha ka sngi Saitjain, ki ju leit phai sha ka Shnong. Ki iathuh ba ha ka 29 tarik Nailar, kine ki shikurim kila mih na katei ka dukan ha ka por janmiet hynrei ha ka sngi babud jong ka Robibar, ynda kila wan phai sha dukan ha ka por 5:30 baje mynstep, kila kyndit ban lap ba ka dukan kala pluh bad ka ding ka dang ing.
Ki iathuh ba ka ding kala bamduh lut ia baroh ki jingdon jingem ha katei ka dur kyntup ia ki tiar bad ka pisa bad ong ba ka jingduhnong kala kot kumba T.30 lak.
Ym tang ba shah thang ka dukan, la pyntip ruh ba ki runar kila rah lut wat ia ki syiar kiba ki ri ha kane ka jaka.
Ki pulit kila register case halor kane ka jingjit bad ka jingtohkit mynta kala iaid shakhmat.
