Shillong Nailar 30: U Chief Executive Member ka Khasi Hills Autonomous District Council (KHADC) u Bah Titosstar Well Chyne, ula ong, ki trai dukan ki bym lah ban pyniaid hi iaki dukan jongki ha Iewduh kidei ban leit aiti noh ha ka Hima Mylliem khnang ban ailad iaki samla khlem kam khlem jam ba kin sengkam.
U Bah Titos ula ong, ia katei hynne ka sngi, ha ka jingplie ia ki kor CCTV bad PA System kiba la pyndait ha ka Iewduh bad ula buh ruh ia u mawnongrim ban tei thymmai ia ka Iew Dielang ha ka jinglut kaba 4 klur tam.
“Ngi lah iohi iaka jingud ki samla bym iohkam iohjam, kumta ka iewduh kadei ban long ka lad ban aikam aijam iaki samla. Ki don 5000 tylli ki Basa hynrei ngam ioh iaka jingkhein ia kaba shong dukan da kiwei pat ki jaidbynriew. Ki trai dukan kidei ban shimti noh halade ban pyniaid ia ki dukan bad lada kim lah ban pyniaid kidei ban aiti noh sha ka Hima Mylliem khnang ba yn ioh ban aiti ha ki samla khlem kam ba kin ioh seng kam” ong u Bah Titos.
“Ngi la pynlut da ki klur tyngka ban pynbha iaka iewduh bad ka Council kan don barabor ban shna bad pynheh iaka iewduh bad dei ban ailad ia ki trai muluk ban shong iew bad kane ka iew kadei ban kiew shaphrang ban long ka jingkyrkhu ym ka jingtim ia u paidbah.
U Bah Titosstar ula ong, mar ia thaw iaka Executive Commitee ula bhah 50 Lak tyngka iaka iewduh na ka bynta ban marmot ia ki lynti iaid bad ula lum iaka jingialang bad ka Hima Mylliem ryngkat bad ki pulit ha kaba iadei bad ka jingshngain hapoh Iewduh khamtam haba jur ki kam tuh kam thiem ia kaba la ud la nam da ki paidbah, kumta ula bthah ia ka tnad pulit ba kan pynbun ia ki pulit hapoh iewduh bad kitei ki pulit kim dei ban phong pat iaka uniphom jongki bad la iakren ruh bad u Syiem ba ka Hima ba kadei ban pyndait iaki CCTV bad ka Hima Mylliem kala pyndep ia kaei kaba la iakren.
Ha kaba iadei bad ka jingkhang ban pyndonkam ne ban die iaki plastik, u CEM ula ong, ka Council kala khang ban pyndonkam plastic, katei kala treikam shipor hynrei hadien la ia sei biang ia ki plastic bad ula kyntu ban ym pyndonkam shuh iaki plastic.
U CEM ula maham da kaba ong, “Ngin phah khynra bad lada lap yn leh da kaba tyngeh hynrei lada dei ki bym dei Khasi ngin hap ban pynduh noh iaka Trading License ka jongki”.
“Ngi la iakren ba ka iew kadei kaba kyntang, dei ban pynthikna ban ym don kiba die kyiad pyrsi, khalai bad kam awria, ngim kwah ba kane ka iew kyntang bad ka pliang ja kan long ka iew kaba Budnam ha ki kam sniew. Ka hima bad u syiem kidei ban pynthikna ba kane ka iew kam dei ban long kaba sniew ne kaba budnam” ong u CEM.
Nalor kane, ula ong ba dei ban pynlong iaka jingpynkhuid iew man la ka por ban wanrah iaka jingkhuid jingsuba.
Ka Executive Member kaba khnih iaka iew ka hat, ka Kong Grace Kharpuri kala ong, ba ka iewduh kadei ka iew kaba rim tam bad kaba heh tam bad ka long kaba donkam ban pynneh iaka jingkhuid jingsuba ban pynsngewtynnad iaki nongwan thied nongwantda bad khamtam ban khring ia ki nongjngohkai kiba wan na kylleng ki ri.
U Executive Member uba khmih iaka tnad Elaka u Bah Jambor War ula ong ka iewduh kadei ka iew kaba kyntang, kaba heh tam bad kaba rim tam bad kadei ka pliang ja kaba la kyrshan bad bsa ia ki trai ri trai muluk bad kumjuh ia ki bym dei Khasi.
Ula ong ka Iewduh kam dei kaba pawnam ym tang ha ka thain shatei lam mihngi hynrei kala paw ha ka ri bad ha kylleng ki ri.
Katba u Acting Syiem ka Hima Mylliem u Paiem Ainam Manik Syiem ula ong, baroh shi katta kila don ki kam sniew kiba la jia hapoh iewduh bad ka long kaba kongsan ban buh iaki CCTV bad ki kor pynsawa khnang ban wanrah iaka jingshngain.
Ula ong ba shen yn sa tei noh iaka iew kaba thymmai ha iew Dielang kaban long 3 mala bad ia mynta yn tei shwa tang iaka Ground Floor bad la buh por ban shna pyndep hapoh 6 bnai bad ia ki mala kiba dang sah yn sa tei hadien.
