Ngi kwah ia u Mantri ban bteng, u wanrah kajuh ka jingsiew ia kajuh ka kam
Shillong, Nailur 13 : Ka Meghalaya 4th Teacher Association kala mih paidbah ban kyrshan ia u Commissioner & Secretary ka Tnad Education Vijay Kumar Mantri bad pyrshah ia ka jingdawa ban weng ia u.
U General Secretary Federick Lyngdoh Tongkhar ula ong ha ka sngi Saitjain ba u Mantri u dei uba la trei borbah ha kaban wanrah ia ki jingpynkylla ha ka rukom treikam na ka bynta ki nonghikai, kynthup ka jingpyntreikam ia kajuh ka jingsiew na ka bynta kajuh ka kam hapoh ka Special Package Framework (SPF).
“Ngim mynjur satia ia ka jingdawa ban weng ia u Vijay Kumar Mantri kumba ngi iohi ha ki lad pathai khubor” ong u Bah Tongkhar.
“U kwah ban wanrah ia ki kam ki ban ai jingmyntoi ia baroh ki nonghikai. Shuwa ban shim ia kino kino ki rai, um ju shim rai hi dalade, u khot ia baroh ki nonghikai ban iakren” ula bynrap.
U Bah Tongkhar ula ong ba ka SPF kala pynkut noh ia ka jingiapher ha ka rukom siew tulop hapdeng ki nonghikai bapher bapher.
“Ha ki snem bala leit, ka tulop hapdeng ki skul ka iapher bha. Mynta lyngba ka PSF, baroh ki nonghikai ba biang kyrdan bad ba trei ia ki kam ba long kumjuh bad kajuh ka por, kila ioh ia kajuh ka jingsiew na ka bynta kajuh ka kam” ula ong.
U ong ba dei ban ailad ia u Mantri ba un bteng khnang ban nang lah pynbha shuh shuh ia ka SPF.
“Ngi kwah ia u ban bteng ia ka kam. Lyngba jong u, ki dang don shibun kiba ngi lah ban wanrah hakhmat ka Sorkar ban nang pynjanai ia ka SPF. Ngi dei ban ai khublei ia ka Sorkar ia kaei kaba kala leh na ka bynta jong ngi bad ngi kmen bha ruh ba ula trei ha ryngkat bad ngi” ong u Bah Tongkhar.
