Shillong, Nailur 13 : Ka jingkhang jong ka BJP ka long kaba plie beit bad bun ki nongialam kila pynkhreh ban wan iasoh na kylleng ki 12 district ka Jylla, ong u nongialam ka BJP bad MLA ka Pynthorumkhrah Bah AL Hek ha ka sngi Saitjain, haba pynthikna ba ka jingiakren ka dang iaid bad ki phra ngut ki MLA ka UDP.
“Ngi la phaikhmat sha ka jingkylla ka sain pyrthei na ka bynta u 2028. Nga la dep pynpaw, ngi la iakren ia kane bad u Myntri kam Pohiing ka Ri Amit Shah. Ngi la pyntip ha u ba ha u 2028 ngin sa thaw ia ka Sorkar ha Meghalaya” ong u Bah Hek haba iakren bad ki nongthoh khubor,
Halor ki khubor ban wan iasoh ki 8 ngut ki MLA ka UDP sha ka BJP, u Bah Hek ula ong ba ka rai ba khatduh ka shong eh ha Delhi.
“Ia kane ka rai yn sa shim da ki nongialam ha Delhi. Nga la thikna ba kin wan iasoh, hynrei ia ka rai yn sa shim da ki nongialam na Delhi. Kano kano ka lah ban jia ha kano kano ka sngi” ula ong.
“Ngam kyntait satia. Ka jingiakren kala don, kumta kata ka sngi kam jngai shuh” ula ong.
Haba jubab ia ka jingkylli la ka Sorkar Pdeng kala pdiang ia ki mat jingdawa jong ki MLA ka UDP, u Bah He hula ong “ Peit, ngan iathuh ia phi, ia ka rai yn sa shim da ki nongialam na Delhi, ym ki nongialam ka Jylla. Ngam ong ba baroh kila urlong hynrei kila ioh ia ka jubab kaba sngewtynnad. Kane kam dei ka jingdawa tang na ka UDP, kane ka dei ka jingdawa jong ki paidbah ka Jylla. Ngi don hangne ban ialeh na ka bynta ka jingmyntoi jong ka Jylla bad ki nongshongshnong”.
U Bah Hek u iathuh ba ka BJP ka dang iakren bad ki nongialam shabar ka ri-lum Khasi bad shabar jong ka UDP.
“Ym tang na ri-lum Khasi-ki don bun ki briew kiba wan kren ia ngi, wan kren ia nga ruh na ki seng sain pyrthei bapher bapher, hynrei ngan nym pynpaw kyrteng na kaei ka seng sain pyrthei. Bad MLA ba mynta lem bad ki MLA barim na ki 12 district ka Meghalaya kin sa wan iasoh sha ka BJP” ula ong.
“Kila shim iala ka jong ka por. Kum u Bah Jemino Mawthoh ula shim ia la ka por” ula ong.
