Shillong, Nailur 13: U nongïalam ka Meghalaya Bharatiya Janata Party (BJP) u Bah AL Hek ha ka sngi saitjaiñ u la ong ba u la sdang ban khroh ïa u MLA barim ka UDP Bah Jemino Mawthoh ban pynïasoh sha ka BJP naduh u snem 2021 bad u la ïaroh ruh ïa u kum u briew uba don ka nongrim kaba skhem bad ka jinglong ban shakri para briew.
Haba pdiang sngewbha ia u Bah Jemino sha ka BJP, u MLA ka Pynthorumkhrah constituency u la ong, “Mynta ka sngi, na ka liang ka BJP, ngi pdiang sngewbha ia u Bah Jemino Mawthoh sha ka BJP.”
“Nga la buddien ia u Bah Jemino naduh u snem 2021. Nga la leit bunsien sha iing jong u ryngkat bad u in-charge barim jong ka Meghalaya ban pynsngewthuh ia u ban iakhun na ka BJP ha ka ilekshon MLA 2023. U u riew khraw bad u briew uba donburom, nga lah ban pynthikna ia kata” la ong u Bah Hek.
Haba kdew ia ka jinglynti jingiaid u Bah Jemino hadien ba u la mih noh na ka UDP, u Bah Hek u la ong, “Shuwa ban rung ha kano kano ka seng sain pyrthei, u la risain noh na ka UDP bad u la shong jar la bun bnai. Kata ka pyni ba u dei u briew uba don ia ki nongrim kiba skhem. Um kwah ban shet kylla ne pynmong iano iano ruh. Uta u dei u Dr Jemino Mawthoh”.
“Nga la ithuh ia u naduh ki por dang samla jong ngi ha ka por ba ngi dang trei haka Seng Samla Shillong. Nga la iatreilang bad kiba bun ki sengbhalang, nga la iohi ia u. Halor ki degree bad ki kyrdan jong u baroh, kaei kaba u sngewthuh ka dei ka jinglong briew,” u la ong.
“Kaei kaba khraw shaphang u Bah Jemino ka long ka jinglong briew — ban shakri ia ki briew mar katjuh. Kata ka long kaba kongsan mynta. Ym ka jingngeit jong nga kaba halor jong nga, ym ka kyrdan jong nga kaba halor jong nga, ym ka kyrdan jong nga kaba halor jong nga — halor jong baroh ka long ka jinglong briew. Lada phi nang ban burom ia ka jinglong briew, lada phi nang ban shakri para briew, kata ka long ka lad kaba bha tam kaba phi lah ban long.
Halor ka jinglong jingman ha ka sain pyrthei, u Bah Hek u la ong ba bun ki MLA ba mynta ki kwah iasoh bad ka BJP bad u pynpaw ruh ia ka jingshaniah ba ka BJP kan ialam ia ka Sorkar ha u snem 2028.
“Ngi la iohi ia ki jingjia kiba dang shen ha kaba bun ki MLA kila pynpaw ba ki kwah iasoh bad ka BJP. Ka thong jong ngi ka long u snem 2028. To buh ia kata ka jingong jong nga, u snem 2028 kan long ka Sorkar ba la ialam da ka BJP ha Meghalaya. Ngi la shim ia kane ka jingkular. Bun ki jingjia kin wan ha ki sngi ban wan, hynrei ngi hap ban pynthikna ba ngin trei shitom” ula ong.
“Lada baroh ngi trei shitom, ngi thikna ba u snem 2028 un long u snem jong ka BJP,” u la bynrap.
Haba iawer ia ki nongtrei bad ki dkhot (Karyakarta) jong ka BJP ban pynkhlain ia ka Party ha man la ki constituency, u Bah Hek la ong, “Baroh ki karyakarta naduh kiba don haki shnong ki thaw hapoh ka Jylla, naduh ki nongialam ha Delhi, ki peit sha u snem 2028 kum ka Sorkar ba la ialam da ka BJP. Mynta ngi hap ban shim ia kane ka jingkitkhlieh. Uwei pa uwei u dkhot jong ka Party kidei ban pynkhlain ia ka Party ha kano kano ka constituency ba ki don khnang ban ioh kham bun ki nombar, namar ha ka sainpyrthei ki nombar ki long kiba kongsan. Ka Party ka don, hynrei ynda ngi la ioh ia ki nombar, ia ka jingbun paid, nangta ngi lah ban ong ba ngi lah ban thaw ia ka Sorkar ha Meghalaya.”
