New Delhi, Nailar 30 : “Ka jingkam jong ka China ba ka Arunachal Pradesh ka dei ka bynta kaba hapoh u pud u sam jong ka ri China ka long ka jingleh pynbitar,” ong u nongkit’tien syiem ka Germany sha India, u Philipp Ackermann.
Ula ong ruh : “Nga tharai ba ka jingpynkhein ia ki kyndon hapoh ki jaka khappud ka long kaba sngewkhia jur bad ia kaba dei ban ym pdiang satia.”
“Ngi la tip bha halor ki jingeh ha ki thain khappud ba shatei jong ka ri,” ong ka lad pathai khubor kaba la shim ia ka jingkren jong u Ackermann.
Kane ka jingpynpaw da une u heh sorkar ka Germany kala wan long ruh hadien ba la sakhi ia ka video kaba pyni ia ki shipai PLA ka China kiba dang bunkam ha kaba iadei bad ka jingpyntrei ia ka surok ha ryngkat ki mashin kiba heh hajan khappud ka India hapoh Arunachal Pradesh.
Ia kane ka video la ring da ki nongshong shnong kiba shong ba sah hajan ki bynta jong ka Hadigara-Delta 6 hapoh Chaglagam ka Arunachal Pradesh.
Ka tnat shipai people’s liberation army (PLA) ka China China kala bunkam ha kaba pyntrei ia ka surok na ka bynta ka jaka pynieng liengsuin hajan Chaglagam kaba hapoh Anjaw district ka Arunachal Pradesh.
Kham hashwa, kata ha u bnai Naiwieng 2021, la iathuh ba ka China kala tei ia haduh kumba 60 tylli ki iing hapoh u pud u sam jong ka Arunachal Pradesh.
Nalor kata, ha u bnai Nohprah 2021, ka China kala pynthymmai ia ki kyrteng jong ki 15 tylli ki jaka, kata kaba kynthup ia ki jaka shong shnong, ki lum ki wah bad ki lynti iaid na ki thain jaka lum kiba don ha ki bynta jong ka jylla Arunachal Pradesh ia kiba kala kam kum la ki jong ki jaka bala khot ‘South Tibet’.
Ka India bad ka China kila ngat ha ka jingiakynad kaba jur ha ki bynta khappud ha ka thain shatei ka Ladakh sector hapoh LAC naduh u bnai Jymmang 2020.
