Shillong, Nohprah 12 : U MLA ka BJP na South Shillong Bah Sanbor Shullai, ha ka sngi Balang, ula thoh shithi sha u Myntri Rangbah ka Assam Himanta Biswa Sarma ba kyntu ban tuklar lem ha kaban pynthikna ia ka jingwan pynpoi masi shoh doh sha Meghalaya khlem kano kano ka jingpynthut.
“Baroh ki tip bha ba ka doh masi ka dei ka jingbam ba bambha da ki nongshongshnong ka Jylla bad haduh 60% jong ka doh masi ba die ha Jylla ka dei kaba wan shalan na shabar ka Jylla. Kumta, na ka bynta ki paidbah ka Jylla, nga kwah ban kyrpad ba phin tuklar ia ka jingwan pynpoi masi shoh doh khlem ka jingpynthut sha Meghalaya da ki nongkhaii bad ki kali kiba don ia ki kot ki slab a la ai da ki bor Sorkar” ong u Bah Sanbor ha ka shithi.
“Hynrei, baroh ki mat bala kdew haneng ki dei kiba la pynpaw haba buh hakhmat ia ka rukom bam jong ki paid riewlum ka Meghalaya bad kam don bynta eiei bad ka jingsngew niam jong kiwei pat ki jaidbynriew bad ki briew hangne kim dei kiba pyrshah ia ka jingngeit niam jong no jong no ruh bad ngi burom bha iaka dustur bad ka jingleh tynrai jong kiwei” ula bynrap.
Haba pynpaw ia ka jingsngew khia halor ka jingkhang bam doh masi ha Assam, u Bah Sanbor ula ong “Kumba phu tip b aka thain Shatei Lam Mihngi ka don ia ki jaidbynriew riewlum bapher bapher kaba ka rukom bam jong ki ka long kat kum ka dustur bad ngi ki briew hangne ngim long pyrshah ia kano kano ka niam ne kwah ban pynmong ia ka jingsngew niam jong no jong no ruh.
Hynrei, ka jingkhang ia ka doh masi dang shen ha Assam kala pynkhynwin hangne ha ka jylla jong ngi bad ki Liang Pyrshah kila pyndonkam ia kane kum ka jingkynnoh pyrshah ia ka NDA ba ka dei ka buit barieh ban khang ia ka doh masi ha ka ri baroh kawei. Wat lada la pynshai na ka por sha ka por da ki Nongialam na Delhi ba ka rukom iabam iadih ka dei ka mat jong ka Jylla, ki Liang Pyrshah kila shim ia ka bynta ban pynsaphriang lamler ia ki jingtip hapdeng ki paid riewlum ka Jylla bad ka thain.
Ula ong ba ka jingkhang doh masi ha Assam kala pynsngewkhia bha ia ki nongshongshnong ka Meghalaya namar ka jingkiew dor ka doh masi na kane ka daw khamtam ba mynta ka dei ka aiom lehkmen ia ka Khristmas bad Snem Thymmai ha Jylla.
