Shillong, Nohprah 12 : Ki shipai BSF ka Meghalaya Frontier, kila ioh ban kurup ia bun bah ki mar khaii tuh sha Bangladesh kiba shongdor haduh T.19 lak.
Ia kine ki mar la ioh ban kurup na khappud bad ki mar bala kurup ki kynthup ia ki jingjah pynbhabriew, ki soh, ka shini, ka kyiad, ki puchka, ki iitkhmat, ki jain, blanker, rynsun bad ka sabon.
Halor ka jingioh khubor, ki BSF kila pynlong ia ka jingkhynra bad iohi ia 7-8 ngut ki nongkhaii tuh ha khappud bad kine ki briew kila phet krad sha khlaw haba iohi ia ki shipai bad iehnoh shadien ia ki mar khaii tuh.
Ia kine ki mar ba ioh kurup la aiti noh sha kaCustom ba kan tohkit bad leh ia kaba donkam.
