Shillong Naiwieng 18: Ka Khasi Students’ Union (KSU), Upper Shillong Circle, kala leit ai dorkhas ha u Junior Engineer ka MePDCL, Upper Shillong Distribution Sub-Division, ban pynsngew halor ka jingeh ki paid nongshong shnong ka thaiñ Upper Shillong namar ka jinglip khah-khah jong ka bording ha kine ki sngi kiba la dep.

Ka seng hapoh ka jingïalam jong u Organising Secretary u Samla Mankhrawbok Marbaniang, kila pynpaw ïa ka jingsngewkhia kaba khraw halor kane ka jinglong jingman, namar ba ka jinglip bording khah-khah ka bording elektrik kala ktah shibun ïa ki nongshong shnong, khamtam eh ïa ki samla kiba dang pynkhreh ïa ki eksamin bapher-bapher.
“Kane ka jingthut jong ka jingsam bording ka wanrah ïa ki jingeh ha ka jingpule bad ka jingpyndep ïa ki kam ki jam jong ki ha ka sngi bad ha ka miet” la ong ka KSU Upper Shillong ha ka kyrwoh.
Ka Seng kala kyntu jur ïa ka tnad MePDCL ba kan shimkhia mardor ïa kane ka kam bad ban wad ïa ki lad ki lynti kiba biang ban pynbeit bad ban weng noh ïa kane ka jingeh, khnang ba ki khun samla bad ki paid nongshong shnong kin lait na ka jingshah ktah na kane ka jingthut jong ka jingsam bording bad kin lah ban bteng ïa ki kam ki jam jong ki khlem kano kano ka jingwit.
Kila pyntip ruh ba na ka liang jong u Junior Engineer ula kular ban shimkhia halor kane ka jingeh bad ban peit bniah ïa ka jingeh kaba la pynsngew da ka KSU Upper Shillong

