Shillong, Nailar 09: Ki pulit Anti Narcotics Task Force (ANTF) ka East Khasi Hills, hynne ka sngi ba-ar, kila ioh ban kem haduh 25 ngut ki nongdie bad nongdih drok na Iew Polo.
Ia kine ki nongdie bad nongdih droks lah ioh ban kem ha ka jing khynra ryngkat bad ki pulit ka Sadar Police Station bad Women Police Station.
Ha kane ka jingkhynra, ka ANTF kala ioh kurup bun bah u drok bad ka pisa na kitei ki briew.
Haduh mynta ki pulit ki dang bteng iaka jingkhynra ban ioh kem ia ki briew ba die ia une u jingdih pynbuaid kum shi bynta ban rat dyngkhong iaka jingdie be-ain ia u drok ha ka thain Polo kaba ki briew na kylleng ki ju wan ban thied ia u drok.
Kat kum ka jingpyntip ki Pulit, ha kane ka jingkhynra ka ANTF, la ioh ban kem ia kawei ka kynthei bad 5 ngut ki shynrang kiba dei ki nongkhaii droks.
U Superintendent of Police (City) u pyntip ba na kine ki nongkhaii droks, la ioh ban kurup haduh 105 tylli ki bilor rit ba don u heroin ba khia 8.89 gram, 286.93 gram u ganja, 20 tylli u dawai kuli Nitrazapam, 330 tylli ki bilor rit ba thylli, 10 tylli ki thyrnia injek, 3 tylli ki tin duma golden ba thylli, 6 tylli ki mobile phone, kawei ka cooty, artylli ki local taxi bad ka pisa ba T. 1,49,280.
Une u Heh Pulit u pyntip ba ki Pulit ANTF kila ioh ban kem ruh haduh 27 ngut ki nongdih droks kiba dang thied ia droks na kine ki nongkhaii.
Uwei napdeng jong ki, u dei u runar ba donkti ha ka Rynjah PS Case No.117(7)22u/s 454/380 IPC uba la phet tuh na Civil Hospital Covid ward myn ha ka 6 tarik Nailar 2022.
Ki Pulit kila rah tohkit ruh ia saw ngut ki kynthei kiba pynthut ia ka jingkhynra jong ki Pulit ANTF.
Ki briew ba shah kem baroh ki kynthup ia 5 ngut ki kynthei bad 32 ngut ki Shynrang. Ia kine ki briew la register case hapoh ka kyndon jong ka NDPS Act.
