Shillong Rymphang 09: U Myntri Rangbah ka jylla u Conrad K Sangma hynne ka sngi Thohdieng ula pynpaw ia ka jingdonkam ba ka Ministry of Development of North Eastern Region (DoNER) kan pynbeit janai bha shuwa ia ki kyndon bad ki jingbthah, ban lah kyntiew ia ka jinglah ki jylla ka thain shatei lam mihngi ban pyndonkam bha ia ka song tyngka ba ai ka Sorkar Pdeng.
“Ka NEC ka don iala ki jong ki kyndon treikam bad ki jingbthah, ia kaba ngim kynnoh namar ba ki hap ban bud ryntih ia ka hynrei lada ka Ministry ka pynbeit janai bha ia kine ki rukom treikam, ia kaba nga lah kdew haka jingialang jongka NEC kaba la long dang shen, ngin sa lah ban pyntrei ia kiei kiei baroh ha ka por kaba sted bha” ong u Conrad K Sangma haba iakren bad ki nongthoh khubor.
Ha ka sngi Palei, u Secretary ka NEC u K Moses Chalai ula pynpaw ba ka jinglah pynlut ki jylla ka thain shatei lam mihngi kynthup ka Meghalaya ia ka pisa kam pat biang satia.
Da kaba kyntait ia katei ka jingkam u heh ophisar ka NEC, u Conrad Sangma ula ong, “Lada ka jingbym lah pynlut ka Meghalaya ia ka bhah tyngka kam long kaba biang, ngin nym lah satia ban pynlut ia ka pisa na ka T.700 Klur sha ka T.2,000 Klur mynta. Lada ka Meghalaya kam kot ia ka jinglah pyndonkam bha, wat ha ka Jal Jeevan Mission ngin ym lah ban ioh haduh T.1300 Klur kaba ngi la ioh mynta u snem bad ka ioh tam ruh ia ka pisa man la u snem na ka JJM.”
“Lada ka Meghalaya kam lah ban pyndonkam bha ia ka song pisa, ka jingtei ia ki 1.40 lak tylli ki iing PMAY ngin ym poi sha ka bynta ba khatduh jong ki Utilisation Certificate kaba kot T.300 Klur. Ngi la dep ban pyndonkam T.1200 Klur mynta u snem kaba long ka rekod namar ha baroh ki snem haba la kyllum lang, ngi la ioh bun tylli ki ing mynta u snem bad la tei ia ki hapoh jong une u snem haba ia nujor bad ki 20 snem kiba la leit. Kumta kam long kaba suk ban shu kdew da ki katto katne ki ophisar” ula ong.
Ula ong, ba ka jingeh hi ka dei namar ba kila don bun palat ki kyndon jingbthah bad ki kyndon treikam ha ka NEC bad ha ka Ministry of DoNER bad ia kine ki jingeh la dep ban pynsngew ha ka jingialang jong ka NEC.
U Myntri Rangbah ula ai nuksa, “Shisien ba ngi la sdang ia ka project bad lashai ngi hap ban pynkylla ia ka rukom trei ha kano kano ka kyrdan namar ka jinglong jingman jong ka khyndew ka long kaba sniew ne ki don ki jingai jingbit ki bym shim la ioh ne ka duna ka jaka, ka rukom treikam ha kaban phah biang sha ka NEC bad ban ioh biang ia ka jingmynjur ka shim por da ki bnai bad ki don ki por ba ka phah biang sha ka tnad sorkar ne shu ong sha ka tnad Jngohkai jong ka ri ban pan iaki jingai jingmut na ka sorkar India ne kin phah ban wanrah da ki riewstad ne riewshemphang bad kum kine ki rukom treikam ka pynlong iaka jingim ban eh shibun”.
“Kumta phin iohi ba ha ka NEC bad DoNER, kiba bun ki jylla kim lah ban pynlut iaka pisa kaba la bhah namar ka jingdon bun palat ki kyndon treikam ia kaba ngam kynnoh ia ki bad kumba nga ong, lada ka jingpynlut ia ka pisa kam don satia ngim yn lah ban ioh ia ka JJM ne IPMAY ne wat ia ka Special Assistance on capital investment. Ka jingshisha ka long ba ngi la lah ban pynlut arshah ia ka pisa kaba la mang na ka bynta ka jong ngi ha kito ki skhim kiba kot palat ia ka hajar klur tyngka” ula ong.
“Tang ban shu ai nuksa ka bhah tyngka jong ka NEC ka long T.1900 Klur na ka bynta baroh ki jylla ka thaiñ shatei lam mhngi. Ka capital investment fund kaba ngi la pynlut ka long T.2000 Klur tang na kawei ka skhim. Kumta ka pyni shai kdar ba ngi lah ban pynlut T.2000 Klur na ka capital investment kumno kumta ngin ym lah ban pynlut ia kaba ioh na ka NEC,” ula bynrap.
Nalor kane, u Myntri Rangbah ula pyntip ba ka NEC kam pat ai ia ka jingmynjur ia ka jingtyrwa ia ka Turmeric Mission haduh mynta.
“Na ka bynta ka Turmeric Mission, ngi la pan na kabynta katto katne ki processing unit kiba T.5 Klur, hynrei haba la ioh ia ka bhah tyngka, la mih da ki kor teknoloji kiba kham biang shuh shuh, kumta ngi la kwah ban kyntiew noh ia ki kor teknoloji bad ngi la pan na ka NEC ban ai ia ka jingmynjur, hynrei haduh mynta ym shim la ioh ia ka jingmynjur” la ong u Conrad.
