Shillong, Rymphang 09: U Myntri Rangbah ka Jylla Conrad K Sangma ula pyntip ba ka Sorkar Jylla kala dep pyllait ia ka tender ban shna noh ia ki lynti iaid kjat bad ki nala ha Iewduh.
Haba iakren bad ki nongthoh khubor, u Conrad ula ai khublei ia ka NEC kaba la mynjur ban mang T. 10 klur ban pynwan dur thymmai ia ka Iewduh.
“Ngi kmen ban pynbna ba ka Sorkar Jylla kala sdang ban pyniaid ia ki kam bad kala dep pyllait ia ka tender ba T. 5 klur ban shna pynbha ia ki nala bad ki lynti iaid kjat ha Iewduh. Ka kam kala iaid bad ynda ka pisa kala wan na ka NEC kan sa nang iarap shuh shuh ia ngi” ula ong.
U iathuh ba ka Sorkar kan sa ioh song pisa ruh na ka Special Assistant on Capital Investment ban shna pynbha lut ia baroh ki iew tynrai bala rim bah hapoh ka Jylla.
