Shillong, Jymmang 25 : U Bah Hally War, uba dei u nongri nongsumar bad nongshna jingkieng tang da ki diengjri, ula ioh pdiang ia ka khusnam “Padma Shri” na ka President ka Ri India, Droupadi Murmu, ha ka jingialang pynkup burom ia ki nongshongshnong ka Ri, kaba la pynlong ha Rashtrapati Bhavan ha ka sngi Nyngkong.
Kum u nongiada mariang ba paw nam bad u nongri syndong ia ka jingstad tynrai u Khasi, u Bah Hally War u la mih kum ka dak ha sla pyrthei na ka bynta ka jingpynwan dur ia ki jingtei da ki jingthung ba im na ka mariang kiba iai neh.
U Bah Hally uba la kha ha ka 5 tarik Rymphang 1957, ula aiti haduh sanphew snem ban ri ban sumar ia ka mariang, ban pynkhlain ia ka jinglah jong ka Shnong ban pynneh pynsah ia ka mariang lyngba ka buit shna jingshna da kaba shu thain ia ki thied ding.
Naduh ka rta ba 10 snem, u Bah Hally ula sumar bad pynwan dur ia ki thied jong ki diengjri ban shna ia ka Jingkieng Jri kaba pawnam jong ka East KHasi Hills ha Meghalaya. Kane ka jingkieng kala pyniasoh ia ki shnong kiba don sha ki sharing lum haba ieng kum ka nuksa ka jingshna ia ka jingkieng kaba iai neh shirta lyngba ka jingstad tynrai.
Napdeng ki synniang ba khraw eh jong u ka dei ka Jingkieng Umkar Living Bridge, kaba pyni ia ka jingpynwandur ba da ki phew snem bad ka jingsngewthuh kaba jylliew shaphang ka jinglong ka mariang.
Kane ka jingkieng ka iai bteng ban ai ia ka lynti iaid kaba shngain ia ki pateng ban wan haba ieng ruh kum ka dak ka jingia dei ba iajan hapdeng u briew bad ka mariang.
Nalor ka jingstad jong u ha ka kam shna ia ka jingkieng, u Bah Hally ula shim ruh ia ka bynta ba kongsan ha kaban kyntiew ia ka ioh ka kot jong ka thain ba u sah. Da kaba ai jinghikai ia ki longiing bad ai pateng ia ka jingstad tynrai ban thain ia ki jingkieng jri, ula pynthikna ia ka jingpynneh pynsah ia kane ka jingai pateng kaba kham niar duh.
Ki jingpyrshang jong u, kila pynkhlain ruh iaka jinglong jingman ka mariang ha ki lum ka thain Sohra bad pynshlur ia ki kam jngohkai kaba lamkhmat da ka Shnong bad kaba iai neh hapoh ka thain.
Watla u im ka jingim kum u nongrep kwai bad sohmarit khlaw, u Bah Hally ula noh synniang sha ka jingsuar ia ka mariang bad ka rukom pynneh pynsah ia ki jingleh tynrai, kala pynioh ia u ia ka jingithuh kum uwei na ki riewkhraw ba shisha jong ka Ri.
Kiba la iadonlang ha kane ka jingialang ki kynthup ia u Vice President ka Ri India, u Myntri Rangbah Duh ka Ri bad u Myntri ka Tnad kam Pohiing ka Ri.
