Shillong, Jymmang 25 : Ka Nongkseh SSCC kala ioh bat ia ka kyrdan kaba nyngkong ha ka Group A quarterfinal leg ka 5th Meghalaya State League da ka jinglah ban pynliem ia ka Mawlai Sport club da 2-1 kol ha ka jingiakhun ba khatduh jong ka group ba long hynne ka sngi Nyngkong ha madan SSA, Polo.
Katba ka Shillong Lajong kala wan ha ka kyrdan kaba ar da ka jinglah ban pynliem ia ka Rangdajied United da 2-0 kol.
Ka Nongkseh kaba la iakhaid mar 1-1 kol bad ka Mawlai ha ka first leg, kala ialehkai tyngeh ban iaknieh ia ka kyrdan nyngkong ha ka Group ban leit sha ka semifinal bad kala pynliem ia kane ka champion u snem bala lah da 2-1 kol.
Ia ki ar kol ka Nongkseh SSCC la thep ia ki da u Chesterpaul Lyngdoh (8′) bad Sheen Sohktung (14′), ia kaba u Syndongmiki Lyngdoh (46′) u la ioh pat ia ka kabu ban thep iaka shi kol naka bynta ka Mawlai marsien ia sdang ka kylla miet.
Ka Rangdajied United ka la hap ban pdiang ia ka nam rem kaba hynriew kynthih ha kane ka quarter final league stage da ka jingliem biang ha ka Shillong Lajong.
Ia ki artylli ki kol ka Shillong Lajong FC la thep da u Fridison Wanniang (42′, 54′).
Haba phai biang sha ka Nongkseh kaba iakhun nyngkong eh ha ka lympung ka MSL, ka la iai bteng ba kan jam shakhmat bad ki 13 tylli ki nam jop, bad kane khlem pep kan ai mynsiem ia ka kynhun ha ka jingpynkhreh ban iakhun ia ka semifinal.
Lashai ka sngi, kan dei artad kaba kut jong ka jingiakhun ka quarterfinal league jong ka Group B, ha kaba ka Maram FC kan mih madan ban iakhun pyrshah ia ka Maram Fc ha ka por 2 baje nohphai sngi bad ha ka por janmiet, ka Rymbai Shkenshynriah SC kan iakhun pyrshah ia ka Nangkiew Irat FC ha ka por 6 baje janmiet.
Kumban shu pynpaw ba ka kynhun ialehkai ka Langsning FCka la buh jaka lypa ialade sha ka semifinal bad kaba sah hi pat kan long ka jingiaknieh hapdeng ka Shkenshynriah bad ka Nangkiew Irat, namar ha ka kylla iakhun ba nyngkong, ka Shkenshynriah ka la lah ba kan pynliem da 2-1 ia ka Nangkiew Irat, ha kaba ka nam iakhaid na ka jingiakhun kaba lashai ka sngi kan biang pura ia kane ka kynhun ba kan jam sha ka semi, katba ka Nangkiew kaei kaba ka donkam ka long beit ia ka jingjop.
