Buh jingkylli ka HNLC ia ka VPP ba “Pynap Borti’ ha jingialap elekshon | Sei madan ia ki MLA crorepati ka Party

Shillong, Jymmang 25 : Ka Hynniewtrep National Liberation Council (HNLA) kala kynnoh ia ka Voice of the People Party (VPP) ia ka “jingiaid khongpong kiba paw pyllein pynlein” hapdeng ka jingiaid ialap elekshon kum ka party kaba duk bad ba ieng na ka bynta kiba duk katba ki nongialam ha ka jingpynbna ia ka jingdon spah ha ka affidavit sha ka Election Commission naduh u snem 2023 ki pyni ba dei ki crorepati.

Ha ka kyrwoh ba pynmih ha ka sngi Nyngkong, u General Secretary ka HNLC Bah Sainkupar Nongtraw ula ong ba katba u President ka VPP bad MLA ka Nongkrem Ardent Miller Basaiawmoit ula pan synniang da ka “Pynap Borti” ha man ba ialap elekshon, ka affidavit jong u pat ka pyni ia ka jingdon spah ba palat T.1.49 klur.

“Ka jingkhmih bniah ia ki affidavit bala aiti sha ka Election Commission ka pyni ia ka jinglong khongpong ba paw pyllein pynlein hapdeng ka dur jong ka VPP ba pyni hakhmat u paidbah bad ka jingdon spah ba shisha jong ki Nongialam” ong u Bah Sainkupar.

“Katba u President ka VPP Ardent Miller Basaiawmoit u iaid ialap elekshon ryngkat ka “Pynap Borti” bad kyntu ia ki nong shongshnong kiba bun ki dei ki nongbylla sngi bad nongrep, ba kin synniang ia ka pisa ba ki kamai da ka umsyep, ka jingdon jingem jong lade pat bala pynbna ka long haduh T.1,49,15,089 (kumba T.1.49 klur)” ula bynrap.

Kat kum ka jingong u Bah Sainkupar, ka affidavit u Bah Ardent ka pyni ia ka jingdon jingsem ba T.1,49,15,089 kynthup ki nongkynti bym lah ban pynkynriah ba T.1.35 klur- ka Iingsah ba T.1 klur ha Laitkor bad ka jaka ba T.35 lak, ki kali ba kynthup ia ka Jeep, Bolero bad Royal Enfiels ba shongdor baroh lang haduh T. 6.7 lak, ki jingdeng ksiar ba T.1.92 lak, bad ka pisa ha Bank ba T.6.15 lak. Ka affidavit ka pyni ruh ba um don ram don shah bad siew income tax.

“Ka kbubor hi ka long ka bym bakla, “  Ngi dei kiba duk. Ngim don pisa. Ngi shaniah ha phi, ki paidbah. “Hynrei une u juh u briew uba bat ia ka borti u don ia ka Iing b alai mala ba shongdor T.1 klur….artylli ki jaka ha Shillong ba T.35 lak..bun tylli ki kali bad jingdeng ksiar….bym don ram don shah” ula ong.

U Bah Sainkular ula kdew ia ka manifesto jong ka VPP ba pynlait ha ka 15 tarik Rymphang 2023, kaba kular “ratdyngkhong ia ka jingduk na ka imlang sahlang bad ka Jylla” ha ryngkat ka jingshngain, ka jingsuk, ka jingkiew shaphrang bad ka jingpynneh pynsah ia ka riti dustur.

“Ka jingkylli kaba dei ban kylli, hato ka VPP ka iakhun pyrshah ia ka jingduk lane ka ioh jingmyntoi/iohnong na ka” ula ong.

Ula kdew ia ka jingbishar bniah jong ka North Easten Hill University (NEHU) ia ka jingiaid ialap elekshon ka VPP ha u 2023, kaba pynpaw ba ki jingialang ka party ki long “kiba la pynlong khlem ki jingpynkhreh pynkhrum bad jingpynpaw ia kano kano ka jingkhraw” bad ba “ki paidbah kila noh synniang da ka pisa na ka bynta ki jingialap elekshon ka party bad wanrah ruh ia ki kali bad pyndonkam ka party”.

“Kane ka pynthikna ba ka buit “pynap borti” ba ki riew paidbah kin synniang iala ka pisa bad ka kali ban bei tyngka ia ka jingiaid elekshon, katba ki nongialam ialade ki pyni ba kim don pisa” ong u Bah Sainkupar.

Une u Nongialam ka HNLC ula bynrap ba laingut na ki saw ngut ki MLA ka VPP ki dei ki crorepati lane jan long crorepati kat kum ki aafidavit jong ki.

U Bah Ardent na Nongkrem u don T.1.49 klur, u Bah Heaving Stone Kharpran na Mawryngkneng u don T.1.09 klur, u Bah Brighstarwell Marbaniang na Mawlai u don T.41.85 lak bad u Bah Adelbert Nongrum na North Shillong ula pynbna T.13.61 lak. Baroh 4 ngut ki MLA kila pynbna T.0 ka jingioh kamai na baroh ki snem mang tyngka.

“Lada dei shisha ba kim don jingkamai, mano ba pynbiang pisa ia ka rukom im jong ki? Nangno ki ioh pisa ban thied ia ki nongkynti, shna ia ki kali, bad nangno ka wan pisa ha jingpynlut ialap elekshon” ula buh jingkylli.

U Bah Sainkupar ula ong ba tang u Bah Adelbert Nongrum napdeng ki MLA ka VPP uba pyni ba ka jingdon pisa ka iahap bad ka jingkren ka party. “Da tang T.13.61 lak ha ka jingdon jingem, ym don jaka, ym don iing, bad tang kawei ka kali scorpio 2014, u dei tang ma u na ki MLA ka VPP uba lah shisha ban kam ba u mihkhmat ia kiba duk. Ki lai ngut kiwei pat kynthup u President Ardent Basiawmoit kim lah satia” ula ong.

“Ki paidbah ka Meghalaya ki dei hok ban ioh ia ka jingleh hok, ym ka drama pynpaw nam…ka VPP kam lah ban leh ia baroh ar. Kam lah ban kam ba ka dei ka party na ka bynta kiba duk katba u President bad ki Nongialam ki dei napdeng ki riew sain pyrthei ba riewspah ka Jylla. Ka borti ka lah ban thylli, hynrei ki pla jong ki nongialam kim thylli” bynrap u Bah Sainkupar.